Fleiri frávik fundust í kjörgögnum Norðvesturkjördæmis í dag

Næst komandi laugardag eru sjö vikur liðnar frá kosningum en Alþingi skal koma saman innan tíu vikna frá því kosið er samkvæmt stjórnarskrá.

Aldrei áður í manna minnum hefur undirbúningskjörbréfanefnd Alþingis haft eins ábyrgðamikið hlutverk og nú eftir kosningarnar 25. september þegar vafi leikur á að rétt hafi verið talið í Norðvesturkjördæmi. Hluti nefndarinnar kom saman öðru sinni á lögreglustöðinni í Borgarnesi í dag til að yfirfara kjörgögn.

Þegar okkur bar að garði um hádegisbil var nefndarfólk að yfirfara flokkun á kjörgögnum með aðstoð starfsmanna Sýslumannsembættisins á Vesturlandi og Alþingis. Birgir Ármannsson formaður nefndarinnar segir að fyrst hafi verið teknar stikkprufur úr atkvæðabunkum en síðan ákveðið að skoða alla bunkana.

Þið eruð í raun og veru að ganga úr skugga um að atkvæði hafi ekki lent hjá röngum flokki?

„Við erum meðal annars að athuga það. Við erum í raun og veru bara að fullvissa okkur um að það séu ekki einhverjar augljósar villur sem hægt er að leiðrétta,“ segir Birgir.

Í fyrri skoðun undirbúingskjörbréfanefndar á kjörgögnum fyrir hálfum mánuði fannst ótalið atkvæði merkt Framsóknarflokknum. Birgir segir að í dag hafi fundist frávik sem þurfi að ræða betur en þau séu ekki stór. Farið hafi verið yfir alla bunka einstakra flokka til að kanna hvort atkvæði hafi verið rétt flokkuð.

Hann telur að gagnaöflun nefndarinnar sé að mestu lokið og að henni lokinni þurfi að taka afstöðu til gildi kjörbréfa sem Landskjörstjórn gaf út að lokinni endurtalningu.

Hvenær heldur þú að þið setjist niður og byrjið að ræða þá stóru spurningu?

„Við gerum ráð fyrir fundi á morgun þar sem við tökum almennar umræður um stöðu mála. Við höfum auðvitað þegar skipst á skoðunum um einhverja þætti í nefndinni. En ég geri ráð fyrir að við byrjum skipulega umræðu um þá þætti á morgun,“ segir Birgir Ármannsson.