Milljónir Af­gana standa frammi fyrir hungur­sneyð

Þetta kemur fram í nýrri skýrslu frá Matvælaáætlun Sameinuðu þjóðanna. Þar segir að rúmlega hálf þjóðin, eða tæplega 23 milljónir manna búi við fæðuóöryggi, og rúmar þrjár milljónir barna gætu orðið fyrir bráðum næringaskorti í vetur.

David Beasley, stjórnandi stofnunarinnar, segir í samtali við BBC að Afganistan sé það land á jörðinni þar sem ástandið er einna verst þegar kemur að neyð. Hann segir afar stutt í algjöran harmleik í landinu.

Yfirtaka Talíbana á stjórn landsins hefur veikt efnahagskerfi landsins enn frekar og var það ekki burðugt fyrir eftir áratuga stríðsátök.

Vesturlönd hafa dregið úr aðstoð sinni við Afgani og Alþjóðabankinn og Alþjóðagjaldeyrissjóðurinn hafa stöðvað greiðslur til landsins.