Lögregluþjónn lýsti kerfisbundnum pyntingum og ofbeldi í Xinjiang

Í kjölfar þess hafi þau verið færð í fangabúðir.

Kínverjar hafa verið sakaðir um mannréttindabrot og jafnvel þjóðarmorð gegn Úígúrum í Xinjiang. Meira en milljón þeirra hefur verið haldið í sérstökum fangabúðum og hafa ásakanir borist um kerfisbundna þrælkunarvinnu, þvingaðar ófrjósemiaðgerðir og alvarlega og umfangsmikil kynferðisbrot.

Ríkisstjórn Kína þvertekur fyrir að brotið hafi verið á úígúrum og hefur því verið haldið fram að fangabúðirnar séu endurmenntunarbúðir. Ráðamenn saka fólk sem hefur stigið fram og greint frá ofbeldi vera lygara.

Blaðamenn CNN ræddu við lögregluþjóninn, sem þeir kalla Jiang, í Evrópu þar sem hann er í útlegð. Hann gat sýnt þeim lögreglubúning sinn, opinber skjöl myndbönd og annað sem staðreyndi að hann hafi verið í lögreglunni.

Frásögnin rýmar við aðrar

Tekið er fram í grein miðilsins að erfitt sé að sannreyna sögur hans en aðgangur að Xinjiang-héraði er verulega takmarkaður og flæði upplýsinga þaðan sömuleiðis. Frásögn hans er þó í samræmi við frásagnir annarra frá Xinjiang.

Meðal annars tveggja úígúra sem CNN ræddi við og rúmlega fimmtíu manns sem sátu í fangabúðum í héraðinu og ræddu við mannréttindasamtökin Amnesty International. Samtökin gáfu í sumar út skýrslu um aðgerðir yfirvalda í Kína í Xinjiang-héraði.

Jiang sagði að fyrst þegar hann hefði verið sendur til Xinjiang, árið 2014, hafi hann farið að ósk yfirmanns síns í lögreglunnar í öðru héraði í Kína. Sá hafi sagt honum að aðskilnaðaröfl vildu slíta Kína í sundur og það þyrfti að ganga frá þeim.

Hann segir tugir þúsunda lögregluþjóna úr öðrum héruðum Kína hafa verið flutta til Xinjiang í gegnum árin. Þeim hafi verið sagt að líta á störf þeirra sem átök og að úígúrar væru óvinir ríkisins. Á einu ári hafi 900 þúsund úígúrar verið handteknir.

Sjá einnig: Hvetja konur til að eignast fleiri börn, nema í Xinjiang

Markmið lögregluþjónanna var að fá fólkið sem handtekið var til að játa á sig glæp. Jiang segir það ítrekað hafa verið gert með pyntingum. Fólk hafi verið barið til óbóta og því nauðgað, þar til þau játuðu glæp.

„Sumir líta á þetta sem starf, aðrir eru bara siðblindir,“ sagði Jiang.

Föngum skipað að nauðga úígúrum

CNN ræddi einnig við Abduweli Ayup, sem er 48 ára gamall fræðimaður frá Xinjiang en býr nú í Noregi. Hann segist hafa verið handtekinn í ágúst 2013. Hann hafði þá opnað leikskóla þar sem hann kenndi börnum tungumál úígúra.

Hann sagði að fyrstu nótt hans í fangelsi hafi fangaverðir látið stóran hóp kínverskra fanga nauðga honum. Fangaverðirnir hafi skipað honum að klæða sig úr nærfötum sínum og fylgst með nauðguninni.

Degi seinna hafi fangaverðir hlegið að honum og spurt hann hvort hann hafi ekki skemmt sér vel.

Jiang sagði CNN að það hefði verið algeng leið til að pynta úígúra að skipa öðrum föngum að nauðga þeim í fangelsum

Ayup var sleppt úr fangelsi í nóvember 2014, eftir að hann gekkst við ólöglegri fjáröflun.