KR tryggði sér sæti í Pepsi Max deild kvenna | FH og Afturelding mætast í úrslitaleik

Ragna Guðrún Guðmundsdóttir kom Aftureldingu í 1-0 gegn ÍA stax á fyrstu mínútu leiksins og þannig var staðan þegar að flautað var til hálfleiks.

Jade Arianna Gentile tvöfaldaði forystu Mosfellinga á 67. mínútu og Guðrún Elísabet Björgvinsdóttir tryggði þeim 3-0 sigur undir lok leiksins. 

Afturelding situr nú í öðru sæti deildarinnar með 37 stig þegar einn leikur er eftir af deildinni, en þær mæta FH í úrslitaleik um laust sæti í Pepsi Max deild kvenna í lokaumferðinni næstkomandi föstudag.

ÍA er hinsvegar í næst neðsta sæti deildarinnar með 14 stig, tveimur stigum frá öruggu sæti. Liðið þarf því að vinna Hauka í lokaumferðinni til að eiga möguleika á að halda sér uppi.

Í viðureign FH og Víkings var það Brittney Lawrence sem að kom FH-ingum yfir eftir tíu mínútna leikm áður en að Nadía Atladóttir jafnaði metin tíu mínútum síðar. Hulda Ösp Ágústsdóttir sá svo til þess að það voru Víkingar sem að fóru með 2-1 forystu ú hálfleik.

Nadía Atladóttir bætti við sínu öðru marki á 62. mínútu og hún fullkomnaði þrennu sína þremur mínútum síðar þegar hún breytti stöðunni í 4-1. Elísa Lana Sigurjónsdóttir klóraði í bakkann fyrir FH-inga stuttu fyrir leikslok, en niðurstaðan varð 4-2 sigur Víkinga sem er nú í fjórða sæti deildarinnar með 28 stig.

FH situr í því þriðja með 36 stig og þurfa á sigri að halda gegn Aftureldingu í lokaleik deildarinnar til að tryggja sér sæti í deild þeirra bestu á komandi leiktíð.

KR-ingar tróna á toppi Lengjudeildarinnar með 39 stig eftir 2-0 sigur gegn Haukum og eiga öruggt sæti í Pepsi Max deild kvenna á næsta ári, þrátt fyrir að hafa aðeins þriggja stiga forskot á FH í þriðja sæti. Ísabella Sara Tryggvadóttir og Bergdís Fanney Einarsdóttir sáu um markaskorun KR-inga.

Þar sem að annað og þriðja sæti mætast innbyrgðis í lokaumferðinni er það orðið ljóst að aðeins annað liðið getur náð KR að stigum og því er sæti í deild þeirra bestu tryggt.