„Bestu liðin, bestu leikmennirnir og mót þar sem allt getur gerst“

„Fólk á von á skemmtun, fyrst og fremst. Við erum að færa útsendingarnar upp á hærra plan og sýnum úr nýja myndverinu okkar í Arena,“ sagði Kristján Einar við Vísi og vísaði þar til nýja rafíþróttastaðarins í Turninum í Kópavogi.

Sýnt verður beint frá stórmeistaramótinu á Stöð 2 eSport næstu tvær helgar. Um helgina fara átta liða og undanúrslitin fram og um aðra helgi er svo komið að úrslitunum.

Á morgun mætast annars vegar Dusty og Rafmos og Þór og XY hins vegar. Sigurvegarnir mætast svo í fyrri undanúrslitaleiknum um kvöldið. Á sunnudaginn eigast Kórdrengir og Vallea og KR og Fylkir við og seinni undanúrslitaleikurinn verður svo um kvöldið.

„Við erum að fara að sjá bestu liðin mætast í stærsta mótinu. Við erum að fá bikarúrslitastemmningu,“ sagði Kristján Einar.

Dusty er ríkjandi stórmeistari og þykja líklegastir til afreka í ár.

„Þeir unnu líka deildina í ár og koma inn sigurstranglegastir inn í þetta mót. En KR og Vallea eru líklegust til að veita þeim keppni,“ sagði Kristján Einar sem lýsir stórmeistaramótinu ásamt Tómasi Jóhannssyni.

„Þetta eru bestu liðin, bestu leikmennirnir, stærri útsending og mót þar sem allt getur gerst. Dagsformið skiptir miklu máli. Það er líka áhugavert að mótinu var frestað og liðin hafa haft miklu lengri tíma til að undirbúa sig en venjulega,“ sagði Kristján Einar að lokum.

Bein útsending frá stórmeistaramótinu hefst klukkan 15:00 á Stöð 2 eSport bæði á morgun og á sunnudaginn.