Þór/KA upp úr fallsæti eftir útisigur

Gestirnir tóku forystuna eftir rúmlega 20 mínútna leik. Colleen Kennedy sótti þá aukaspyrnu sem Jakobína Hjörvarsdóttir tók. Jakobína lét vaða og boltinn flaug yfir Tiffany Sornapo í marki Keflvíkinga.

Staðan var því 1-0 í hálfleik, en á 65. mínútu voru gestirnir búnir að tvöfalda forystuna. Colleen skundaði þá inn á teig Keflvíkinga og Tiffany mætti henni. Boltinn hrökk þá af Tiffany í varnarmann, og þaðan fyrir fætur Margrétar Árnadóttur sem kláraði í tómt markið.

Keflvíkingar fengu líflínu á 89. mínútu þegar Amelía Rún Fjeldsted skrúfaði boltann í hornið frá vítateigshorninu.

Heimakonur sóttu seinustu mínúturnar en náðu ekki að skapa sér nægilega gott færi til að jafna leikinn. Það var því Þór/KA sem fór með 2-1 sigur af hólmi.

Með sigrinum lyftir Þór/KA sér úr níunda sæti og upp í það sjöunda með 11 stig. Keflavík er enn með níu stig en fellur úr sjöunda sæti og niður í það áttunda.

Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.