Aðgerðin hjá Guðlaugu Eddu varð næstum því tvöfalt lengri en áætlað var

Guðlaug Edda hefur verið að glíma við langvinn mjaðmarmeiðsli sem áttu á endanum urðu til þess að hún náði ekki að tryggja sig inn á Ólympíuleikana í Tókýó.

Eftir rannsóknir og ráðgjöf kom í ljós að hún gat komist í aðgerð hjá heimsklassa mjaðmarsérfræðingi í Bandaríkjunum sen sá hinn sami taldi sig geta bjargað ferli hennar.

Edda setti strax stefnuna á Ólympíuleikana í París 2024 við þær fréttir en þurfti á mikilli peningahjálp að halda til að eiga fyrir aðgerð sem þessari.

Edda og kærasti hennar Anton Sveinn McKee hófu því fjársöfnun á netinu þar sem ætlunin er að safna fyrir þessum sjö milljónum sem aðgerðin kostar.

„Elsku Anton minn búinn að styðja mig svo mikið undanfarnar vikur, hjálpa mér að ákveða skurðlækni, finna fjármagn fyrir aðgerð, rífa mig upp og trúa á mig þegar ég átti erfitt með að trúa sjálf. Á ekki eitt orð yfir þér og það í miðjum undirbúningi fyrir stórmót. Þú vinnur Tókýó og ég vinn Comeback - heyrðuð það fyrst hér,“ skrifaði Edda á Instagram en Anton Sveinn keppir fyrir Ísland í sundi á Ólympíuleikunum í sumar.

Edda sagði sögu sína með hjartnæmum hætti og hefur fengið ágæt viðbrögð við söfnuninni þótt betur megi ef duga skal. Edda fór síðan í aðgerðina í fyrradag og sagði frá henni á Instagram síðu sinni.

„Aðgerðin er að baki og ég hef þegar hafið endurhæfingu. Skemmdin var verri en við bjuggumst við og meira en helmingurinn var rifinn. Aðgerðin endaði því í þremur og hálfum tíma í stað þeirra tveggja sem hún átti að taka,“ skrifaði Guðlaug Edda eins og sjá má hér fyrir ofan. Þar má sjá meiri lýsingu á því sem var gert.

„Ég braggast vel og er ánægð að vera komin í gegnum þetta. Ég ætla að stjórna því sem ég get stjórnað og er mjög spennt fyrir að byrja endurkomuna. Þetta getur bara gert mig sterkari,“ skrifaði Edda en bendir um leið á það að einn þriðji hefur nú safnast í fjáröfluninni fyrir aðgerðinni.

Það er hægt að styrkja Eddu með því að fara hér inn.