Mikla­torg nýtt hjarta Hlíðanna í til­lögum um Miklu­braut í stokk

Fimm tillögur voru kynntar á fundinum: tillaga Traðar, Kanon og VSÓ; tillaga Yrki, DLD og Hnit; Tillaga ASK, Eflu og Gagríns; tillaga T.ark, SEW, Verkís og ITP; og tillaga Arkís, Landslags og Mannvits.

Í fyrstu tillögunni sem var kynnt, tillögu Arkís, Landslags og Mannvits, er lögð til uppbygging á nýju torgi, Miklatorgi, sem verði fjölbreytt miðsvæði sem bjóði upp á verslun, þjónustu og atvinnuhúsnæði í bland við fjölbreyttar íbúðir. Lega Borgarlínu muni falla vel að þessari nýju þéttu borgarbyggð. Þar er gert ráð fyrir þriggja til fimm hæða byggð og segir í tillögunni að lögð verði sérstök áhersla á svæðið sunnan Norðurmýrar, þar sem nú sé gjá með þungum straumi umferðar sem skeri byggðina í sundur.

Í þeirri tillögu er gert ráð fyrir stokki á einni hæð, sem muni liggja þar sem Miklabraut og Hringbraut liggja í dag. Þar verði tvær akreinar í hvora átt. Snorrabraut muni liggja á yfirborði, ofan á og þvert á stokkinn og muni tengjast Bústaðavegi á yfirborði. Á Miklatorgi er svo gert ráð fyrir að verði umferðarmiðstöð Borgarlinu og að frá miðstöðinni liggi Borgarlínuleið til vesturs að Hörpu og Háskóla Íslands og í austur til Grafarvogs og Mosfellsbæjar. Þá verði Borgarlínuleið til suðurs yfir Kársnesbrú til Kópavogs, Garðabæjar og Hafnarfjarðar.

Í annarri tillögu, tillögu Yrkis, DLD og Hnit er lögð áhersla á að tengja saman íbúabyggð í Hlíðum við Norðurmýri og Hlíðarenda. Þá verði byggður upp hverfiskjarni þar sem kjarnastöð Borgarlínu verður. Þá verði stóru útivistarsvæðin Klambratún og Öskjuhlíð tengd saman gegn um Hlíðarenda með minni almenningsgörðum og torgum.

Lagt er til að meginumferð Miklubrautar til austurs og vesturs fari í stokk undir Snorrabraut. Snorrabraut veðri síðan framlengd ofan á stokknum yfir á Arnarhlíð og Nauthólsveg. Umferð í vestur eftir Bústaðavegi fari svo ofan í stokkinn og yfir Miklubraut þar sem umferðin tengist síðan vesturstraumi brautarinnar. Gert er ráð fyrir bílastæðahúsi á austurenda lóðar Landspítalans, undir kjarnastöð Borgarlínunnar. Þá verði hægt að aka beint úr stokknum inn í bílastæðahúsið og aftur út. Þá er lagt til að ný byggð verði ofan á stokknum sem muni tengja saman íbúabyggð í Hlíðum við Norðurmýri og Hlíðarenda.

Í tillögu Traðar, Kanon og VSÓ er lagt til að með tilkomu stokksins verði gerð ný samgöngumiðstöð, Miklatorg, sem verði ofan- og neðanjarðar. Þar á meðal verði þar kjarnastöð Borgarlínu og samþætt byggð ofan á stokknum. Hverfi norðan og sunnan Miklubrautar sameinist í nýju hverfi á Hlíðarenda og Landspítalalóð.

Undir Miklatorgi verði stokkurinn að hluta á tveimur hæðum. Neðst liggi fjórar akreinar Miklubrautar og Hringbrautar. Á efri hæð stokksins veðri aðkoma að kjallara samgöngumiðstöðvar fyrir almenningssamgöngur af landsbyggðinni, hraðleiðir sem ekki stoppi á biðstöðvum í Hlíðum. Þá er gert ráð fyrir að hægt verði að aka beint úr stokknum í bílakjallara á Landspítalalóð og möguleiki sé á að tengja stokkinn til norðurs upp Snorrabraut.

T.Ark, SEW, Verkís og ITP leggja til að umferðarkerfið verði þriggja hæða. Neðst verði Miklabraut, svo Bústaðavegur og á yfirborði verði Borgarlínan. Auk Miklubrautar í stokk verður Bústaðarvegur tengdur Snorrabraut í stokki og að- og afreinar sömuleiðis undir yfirborðinu. Þannig skapist enn meiri möguleikar á að tengja saman hverfin og tryggja öruggar leiðir fyrir hjólandi og gangandi. Í stað þungrar umferðar um Miklubraut verði þar byggð og útivistarsvæði.

Í fimmtu og jafnframt síðustu tillögunni, tillögu Asks, Eflu og Gagarín, er Miklatorg enn og aftur hjartað í tillögunni. Lögð er áhersla á að Spítalinn, háskólarnir tveir, flugvöllurinn, íþróttasvæðið á Hlíðarenda og útivistarsvæðin í Öskjuhlíð og Klambratúni tengist nánari böndum. Meginumferð bíla frá austurs til vesturs verði færð í stokk og opnist því svæðið á nýjum forsendum allra ferðamáta. Snorrabrautin verði þó áfram á sínum stað og tengist Hlíðarenda með Borgarlínu.

Hægt er að lesa meira um tillögurnar hér.