Danir kveðja grímurnar nær al­farið eftir nýtt sam­komu­lag um til­­slakanir

Samkomulagið felur meðal annars í sér að frá næsta mánudegi munu Danir einungis þurfa að bera grímu í almenningssamgöngum, og þá bara þeir sem standa. Grímuskyldu verður svo alfarið afnumin fyrsta dag septembermánaðar.

Heilbrigðisráðherrann Magnus Heunicke greindi frá samkomulaginu í nótt, en tæpur þriðjungur Dana telst nú fullbólusettur gegn kórónuveirunni.

Veitingastaðir og barir mega frá morgundeginum hafa opið og selja áfengi til miðnættis, í stað klukkan 22 líkt og verið hefur síðustu vikurnar. Frá miðjum júlí má svo hafa opið til klukkan tvö. Frá 1. júlí munu samkomur miðast við 250 manns að hámarki.

Dómsmálaráðherrann Nick Hækkerup segir að áfram verði víða notast við hið svokallaða kórónuvegabréf til að fá aðgang að ákveðnum stöðum. Kórónuvegabréfið er opinbert stafrænt vottorð sem sýnir fram á að viðkomandi sé annað hvort bólusettur, hefur fengið Covid-19 síðasta hálfa árið eða þá hafi fengið neikvæða niðurstöðu úr sýnatöku á síðustu þremur sólarhringum. Notkun vegabréfsins verður afnumin í skrefum.

Allir stjórnmálaflokkar á danska þinginu – að Nýjum borgaralegum fráskildum með sína fjóra þingmenn – standa að samkomulaginu.