Fór yfir ótrúlegan sjö mínútna kafla Árna Braga

Árni Bragi skoraði ellefu mörk og var sérstaklega öflugur seinni hluta fyrri hálfleiks þegar KA lék með sjö sóknarmenn. Theodór Ingi Pálmason fór yfir þennan ótrúlega kafla Árna Braga í Seinni bylgjunni í gær.

„Hann var alveg frábær á þessum kafla í lok fyrri hálfleiks. Valsararnir náðu að bregðast við í byrjun seinni hálfleiks með því að færa Einar Þorstein [Ólafsson] fyrir framan og trufla flæðið,“ sagði Theodór. 

Því næst sýndi hann sjö sóknir KA í röð þar sem Árni Bragi tók alltaf rétta ákvörðun, skoraði eða bjó til dauðafæri. KA-menn skoruðu sex mörk í þessum sjö sóknum.

„Þetta eru sjö sóknir í röð á tæplega sjö mínútna kafla. Þetta voru hornasendingar, línusendingar, skot og þversending yfir á skyttuna hinum megin. Hann kom KA inn í þennan leik,“ sagði Theodór um Árna Braga.

Mosfellingurinn er markahæstur í Olís-deildinni 158 mörk í 21 leik, eða 7,5 mörk að meðaltali í leik.

KA, sem er í 5. sæti Olís-deildarinnar, sækir Þór heim í Akureyrarslag í lokaumferðinni á fimmtudaginn. KA-menn tryggðu sér sæti í úrslitakeppninni í síðustu viku, í fyrsta sinn í sextán ár.

Seinni bylgjan er uppgjörsþáttur Stöðvar 2 Sports um Olísdeildir karla og kvenna í handbolta og er á dagskrá öll mánudagskvöld. Upptökur af þættinum má nálgast á sjónvarpsvef Stöðvar 2. Olísdeildin er hluti af Stöð 2 Sport Ísland.