Fjórir slasaðir eftir hnífaárás í matvöruverslun

Jacinda Ardern forsætisráðherra Nýsjálendinga segir enn óljóst hvað lá að baki árásinni en segir þó ekkert benda til þess að um hryðjuverk hafi verið að ræða. 

Samkvæmt BBC eru bæði starfsmenn og viðskiptavinir meðal slösuðu.

„Við heyrðum bara öskur og héldum að einhver hefði dottið en svo varð það bara hærra og hærra og fleiri fóru að öskra,“ sagði vitni í samtali við Otago Daily Times.

„Ég sá eina rauða hönd meðal fólksins; blóðuga hönd og allir hlupu að dyrunum.“

Nokkrir viðskiptavinir verslunarinnar eru sagðir hafa reynt að halda árásarmanninum.

Verslunin verður lokuð í dag og á morgun.

Atvik sem þessi eru fátíð á Nýja Sjálandi en þó eru atburðirnir í Christchurch fólki enn í fersku minni þar sem kynþáttahatari skaut fimmtíu manns til bana í tveimur moskum árið 2019.