Sævaldur: Himneskt

Sævaldur var spurður að því hvað hann hafi lagt áherslu á í lokasókn KR en Hansel Atencia stal þá boltanum af Matthíasi Orra Sigurðarsyni geystist upp völlinn og skoraði þriggja stiga körfu á hlaupinu þegar leiktíminn rann út.

„Við ætluðum bara að halda mönnum fyrir framan okkur, við vitum að Matti er góður í því að fara inn í miðjuna. Hansel gerði bara fáránlega vel að blaka boltanum og tryggja hann. Þá er það bara spurningin um að gera vel með tímann sem er eftir og Hansel skoraði frá miðju í síðustu umferð á móti ÍR og setur síðan þessa körfu hérna fyrir okkur sem er frábært. Himneskt.“

Sævaldur var spurður út í trúna sem virðist vera að skapast hjá Haukum en fyrir Covid pásuna þá voru þeir í slæmum málum á botni deildarinnar en nú eru þeir allavega þangað til á morgun í næstneðsta sæti.

„Sko við þurfum að átta okkur á því að það eru fullt af gæðaleikmönnum í liði Hauka eins og í öllum liðunum í úrvalsdeild karla. Ég hef sagt það  áður að þegar þú byrjar að tapa leikjum þá nærðu ekki að laga það á meðan deildin er spiluð svona ofboðslega þétt. Þú getur ekki gert neinar breytingar. Israel Martin er frábær þjálfari og frábær náungi en það er bara stundum þannig að það er erfitt að gera eitthvað þegar maður spilar bara eftir tvo daga.“

„Svo fer allt í lás aftur, við æfðum bara eins og mátti gera, en strákarnir eru bara ofboðslega duglegir og afsakaðu orðbragðið en þeir eru bara fokkin duglegir. Ég verð bara að hrósa öllum mínum leikmönnum mikið hrós því þeir gerðu þetta allt mjög vel. Þeir hafa trú, hvort sem við förum niður eða ekki, en við erum ekkert á leiðinni niður. Við einbeitum okkur bara að því að vinna næsta leik og fyrir okkur eru þetta fjórir bikarúrslitaleikir eftir. Við eigum Tindastól heima á föstudaginn og afhverju ekki? Við vorum að koma í Vesturbæinn á einn erfiðasta útivöll í Íslandssögunni og við erum hörkugóðir langan hluta úr leiknum. Missum aðeins dampinn í byrjun fjórða leikhluta og ég hef oft sagt það að þú þarft að vera aðeins meira yfir á móti KR til þess að klára leikina því þeir kunna þessa list betur en aðrir. Ég er bara rosalega stoltur af mínum mönnum hvernig þeir lokuðu þessum leik í kvöld“, sagði Sævaldur en hann var í hæstu hæðum enn þá löngu eftir leik skiljanlega.