Zlatan snýr aftur í sænska landsliðið: „Endurkoma guðs“

Zlatan er í sænska hópnum sem mætir Georgíu, Kósóvó og Eistlandi í undankeppni HM 2022 síðar í þessum mánuði. 

Búist er við því að Zlatan spili svo með sænska landsliðinu á EM í sumar. Þar eru Svíar í riðli með Spánverjum, Pólverjum og Slóvökum.

Zlatan var hógvær að vanda þegar hann tilkynnti um að hann hefði tekið landsliðsskóna af hillunni. „Endurkoma guðs,“ skrifaði sá sænski á Twitter.

Zlatan lagði landsliðsskóna á hilluna eftir Evrópumótið í Frakklandi 2016. Hann hefur leikið 116 landsleiki og skorað í þeim 62 mörk. Hann er markahæsti leikmaður í sögu sænska landsliðsins.

Zlatan, sem er 39 ára, hefur leikið vel með Milan á tímabilinu og skorað sextán mörk í öllum keppnum.