Dæmdur til dauða fyrir morð á frönskum fjall­göngu­manni

Hervé Gourdel, 55 ára Frakka, var rænt þar sem hann var á ferð um Djurdjura-þjóðgarðinum, austur af Algeirsborg í september 2014. Síðar birtist myndband á netinu þar sem sjá mátti þegar Gourdel var afhöfðaður.

Hryðjuverkahópurinn Jund al-Khilafa, sem hefur haft tengsl við ISIS, lýsti yfir ábyrgð á ódæðinu.

Í frétt BBC segir að einn grunaðra, Abdelmalek Hamzaoui, hafi mætt í dómsal í gær, en réttað var yfir öðrum í þeirra fjarveru.

Hamzaoui hafnaði því að hafa átt þátt í morðinu og sagðist hafa verið bendlaður við málið til að „loka málinu og friðþægja Frakka“. Fjöldi samferðamanna Gourdel, sem einnig var haldið föngnum, sögðu Hamzaoui þó hafa verið einn úr hópi mannræningjanna.

Þó að Hamzaoui hafi verið dæmdur til dauða þá hefur dauðarefsingum ekki verið framfylgt í Alsír síðan 1993.

Mannræningjar Gourdel birtu myndbandið eftir að frönsk stjórnvöld neituðu að verða við kröfum þeirra um að árásum gegn liðsmönnum ISIS í Írak og Sýrlandi yrði hætt.

Lík Gourdel fannst ekki fyrr en í janúar 2015, eftir þátttöku þúsunda alsírskra hermanna í leitinni.