Kjartan ekki til Íslands strax en ætlar upp með Ólafi

Kjartan var áður hjá Horsens í Danmörku en fékk samningi sínum við félagið rift fyrir helgi, af fjölskylduástæðum. Íþróttastjóri Horsens sagði félagið hafa orðið við beiðninni svo að Kjartan gæti komist heim til Íslands.

Nú er Kjartan hins vegar orðinn leikmaður Esbjerg sem leikur í næstefstu deild Danmerkur, undir stjórn Ólafs Kristjánssonar. Fyrir hjá félaginu er annar íslenskur markaskorari, Andri Rúnar Bjarnason.

Esbjerg er í baráttu um að komast upp í dönsku úrvalsdeildina en liðið er jafnt Viborg á toppnum eftir 16 umferðir, með 38 stig, sjö stigum á undan næsta liði sem er Silkeborg.

„Esbjerg er stórt félag sem á heima í efstu deild, svo að þegar sá möguleiki bauðst að spila hérna gat ég ekki sagt nei. Ég hef nokkrum sinnum farið upp um deild á mínum ferli og ég er með það markmið að gera það aftur með mínum nýju liðsfélögum. Ég mun leggja allt í sölurnar til þess,“ sagði Kjartan sem verður 35 ára í sumar.

Miðað við að Kjartan verði hjá Esbjerg út leiktíðina mun hann væntanlega ekki spila á Íslandi fyrr en í fyrsta lagi í júlí.

Kjartan Henry hóf leiktíðina sem leikmaður Vejle í dönsku úrvalsdeildinni, eftir að hafa orðið markakóngur þegar Vejle komst upp úr 1. deild í fyrra. Hann rifti hins vegar samningnum við Vejle eftir að hafa verið settur í hlutverk varamanns í upphafi leiktíðar, og fór til Horsens en þar hafði hann áður leikið í fjögur ár frá 2014-2018.