Sjötti sem finnst látinn í Ask

Lögregla greindi frá því fyrir skemmstu að sjötta líkið hafi fundist um miðjan dag í dag. Björgunaraðgerðir muni halda áfram í kvöld og í nótt.

Leitarsvæðið hefur verið stækkað nokkuð frá því sem var og hefur lögregla sagt að enn sé haldið í vonina um að einhver finnist á lífi, þó hún dvíni með hverjum deginum sem líður.

Björgunaraðilar hafa notið liðsinnis norska hersins við leitina, og þá hafa starfsmenn almannavarna dælt vatni úr tjörn sem hefur byrjað að renna inn á hamfarasvæðið og þannig torveldað leitina enn frekar.

Haraldur Noregskonungur og Sonja drottning, auk Hákons krónprins, heimsóttu Ask í morgun og ræddu meðal annars við fólk sem missti allt sitt í hamförunum.