Fyrstu sýkingarnar líklega komið upp í janúar

Niðurstöður rannsóknar sem kynnt var í dag benda til þess að fyrstu tilfelli af kórónuveirunni sem veldur Covid-19 á Ítalíu hafi komið upp í janúar. Ítalía hefur komið einna verst allra þjóða út úr faraldrinum, en tæplega 26 þúsund hafa látist. Reuters greinir frá. 

Fyrsta smitið var staðfest á Ítalíu þann 21. febrúar í bænum Codogno í Langbarðalandi. Í kjölfarið fóru fleiri tilfelli að koma upp, dauðsföll fóru að aukast og lék grunur á að veiran hefði smitast á milli manna í töluverðan tíma í landinu áður en fyrsta smitið var staðfest.

Á blaðamannafundi í dag kom jafnframt fram að fyrstu tilfellin hefðu verið skoðuð og út frá því var dregin sú ályktun að mikill fjöldi fólks hefði verið smitaður áður en fyrsta smitið var staðfest. Það væri það eina sem myndi útskýra hraða aukningu í staðfestum smitum í landinu.

Faraldurinn hafi þannig hafist í janúar, mögulega fyrr. Þá væri líklegast að hópur fólks hefði komið með smit til landsins frekar en að einn einstaklingur hafi borið með sér smit sem hefði svo smitast í aðra.