Situr einn að World Class í Laugum þökk sé mömmu og pabba

Björn Boði Björnsson er sonur Björns Leifssonar og Hafdísar Jónsdóttur sem eiga og reka World Class. Það kemur sér vel fyrir Björn Boða. 

Hann greinir frá því á TikTok að hann hafi getað skellt sér í ræktina, annað en aðrir Íslendingar.

Eins og alþjóð veit eru allar líkamsræktarstöðvar landsins lokaðar vegna samkomubanns sem sett var á í kjölfar kórónufaraldsins sem veldur Covid-19 sjúkdómnum.

„Þegar líkamsræktarstöðvar eru lokaðar vegna kórónuveirunnar en foreldrar þínir eiga líkamsræktarstöð,“ segir Björn Boði í færslunni á Tik Tok.

Þar sést hann kveikja ljósin í Laugum, mynda tóm rýmin og taka á lóðunum.