Leiðrétta misskilning sem spratt upp vegna merkinga á spritti

Sprittbrúsar sem nú eru seldir í verslunum hér á landi hafa vakið athygli fyrir umbúðir sem taldar eru geta valdið misskilningi um að um drykk sé að ræða. Merkingar brúsanna þóttu ekki gefa nógu sterklega til kynna að um handspritt væri að ræða. Eins þykja tappar á brúsunum gefa til kynna að um drykk sé að ræða. Framleiðandi sprittsins segir að búið sé að finna lausn á vandanum.

Um er að ræða brúsa af spritti sem framleiddir eru af íslenska áfengisframleiðandanum Volcanic Drinks. Eyrún Arnardóttir hjúkrunarfræðingur er meðal þeirra sem vakti athygli á málinu. Hún segist sjálf hafa meðhöndlað fullorðna einstaklinga sem hafi innbyrt skaðleg efni í þeirri trú að um drykk væri að ræða. Hún viti því hve miklu máli skilmerkilegar merkingar geta skipt og bendir sérstaklega á að gott væri ef merking brúsans væri á fleiri tungumálum, til að mynda ensku og pólsku.

„Við lifum þá tíma þar sem við þurfum handspritt, en það þarf að passa upp á hvernig umbúðir það er sett í,“ segir Eyrún í samtali við fréttastofu.

Hún segist hafa haft samband við framleiðendur og komið ábendingu um umbúðirnar á framfæri.

„Það er auðvitað mjög sniðugt að þau noti sína aðstöðu til að framleiða handspritt. Það er mikil eftirspurn eftir því og það hefur sárlega vantað það í landið. Nema kannski það að velja þessar umbúðir. Ég sagði þeim hvað væri svona varhugavert við þessar flöskur og þau sögðust ætla að skoða málið,“ segir Eyrún.

Hún bætir þá við að ábendingunni hafi verið komið á framfæri síðastliðinn laugardag, en síðan þá hafi hún ekkert heyrt frá fyrirtækinu.

Vinna að því að taka af allan vafa um innihald

Vísir hafði samband við Alfreð Pálsson, einn eigenda Volcanic Drinks, og spurðist fyrir um málið. Alfreð segir að unnið hafi verið úr ábendingum um merkingar á brúsunum og að nýir miðar séu á leið í prentun á næstunni.

„Aðalmálið er að við erum að láta endurhanna miðana upp á nýtt. Hins vegar viljum við hafa þessa tappa áfram, en Umhverfisstofnun er búin að leggja blessun sína á þá. Það eru hvergi til pumpur, það er allt upp urið í Evrópu og hvar sem er. Þess vegna þykja þessir svokölluðu sporttappar hentugir til að skammta úr flöskunni,“ segir Alfreð.

Ljóst er að pumpuskorturinn er ekki úr lausu lofti gripinn, en fyrir stuttu beindu Umhverfisstofnun og Embætti landlæknis, að höfðu samráði við framleiðendur sótthreinsivara, þeim tilmælum til almennings, fyrirtækja og stofnana að henda ekki handpumpum af handsprittbrúsum, sápum eða öðrum sótthreinsivörum heldur endurnýta þær í ljósi þess að skortur er á slíkum pumpum í heiminum og fyrirsjáanlegt að framleiðendur geti einungis framleitt handspritt í áfyllingarbrúsum án pumpu.

Sjá einnig: Fólk beðið að endurnýta pumpur af sótthreinsivörum

Alfreð segist þá skilja að miðinn hafi valdið misskilningi, en nú sé verið að vinna bót á því.

„Við látum fylgja með í hverjum kassa miða sem eru límdir aftan á kassana. Þeir eru bæði á pólsku og ensku og við breytum miðanum þannig að hann líti ekki út eins og um drykk sé að ræða, eða hvaða annar misskilningur sem gæti orðið. Það er markmiðið með breytingunni.“

Eins segir Alfreð að þess hafi verið farið á leit við verslanir sem selja sprittið, að uppstilling á vörunni verði með þeim hætti að ekki líti út fyrir að um drykk sé að ræða.

„Þetta er það sem við erum að gera. Við erum í raun bara að svara eftirspurn.“