Greiða atkvæði um nýja stjórnarskrá

Kjósendur í Síle greiða atkvæði um hvort tekin skuli upp ný stjórnarskrá í þjóðaratkvæðagreiðslu í dag. Sú gamla er frá tíð einræðisherrans Augusto Pinochet en lagt er til borgarar semji þá nýju.

Krafan um nýja stjórnarskrá var fyrirferðamest í mótmælum sem blossuðu upp í Síle í fyrra. Mótmælin hafa haldið áfram eftir að slakað var á takmörkunum vegna kórónuveirufaraldursins.

Þrír valkostir eru á kjörseðlinum. Kjósi fólk með því að taka upp nýja stjórnarskrá geta þeir valið á milli þess að láta borgarafund sem yrði sérstaklega kosinn til þess semja hana eða blöndu óbreyttra borgara og þingmanna. Borgarafundur væri skipaður körlum og konum til jafns og frumbyggjar í landinu fengju sína fulltrúa, að sögn Reuters-fréttastofunnar.

Einfaldur meirihluti dugar til að tillaga teljist samþykkt. Skoðanakannanir benda til þess afgerandi meirihluti samþykki að taka upp nýja stjórnarskrá.

Núverandi stjórnarskrá Síle var samin af Jaime Guzman, nánum ráðgjafa Pinochet, árið 1980. Henni hefur aðeins verið breytt lítillega síðan til þess að takmarka völd hersins og framkvæmdavaldsins.