Dauðsföll í Evrópu komin yfir 250.000

Fjöldi látinna í kórónuveirufaraldrinum fór yfir 250.000 manns í Evrópu í dag og varð álfan þar með annar heimshlutinn til að fara yfir þann þröskuld. Metfjöldi nýrra smita hefur greinst í Evrópu undanfarnar tvær vikur.

Met yfir fjölda daglegra smita voru slegin í mörgum löndum Suður-Evrópu í vikunni og fór heildarfjöldi nýsmitaðra á einum degi í álfunni allri í fyrsta skipti yfir 200.000 á fimmtudag. Mörg ríki hafa brugðist við með hertum sóttvarnaaðgerðum og útgöngubanni.

Um fimmtungur allra dauðsfalla í kórónuveirufaraldrinum til þess hefur verið í Evrópu samkvæmt talningu Reuters-fréttastofunnar. Rómanska Ameríka var fyrsta landsvæðið sem fór yfir 250.000 dauðsföll en einnig stefnir í að Bandaríkin nái þeim fjölda á næstu vikum eða mánuðum. Þar hafa aldrei greinst fleiri ný smit á einum degi en í gær.

Mest hefur mannfallið verið í Bretlandi, Ítalíu, Frakklandi, Rússlandi, Belgíu og Spáni eða tvö af hverjum þremur dauðsföllum í faraldrinum í álfunni. Í heildina hafa um átta milljónir manna smitast af veirunni í Evrópu.

Ástandið er einn verst í Rússlandi þessa dagana þar sem um 250 manns láta lífið á hverjum degi. Þar á eftir koma Bretland og Frakkland með rúmlega 140 dauðsföll á dag.