Ný Gróttunýlenda hjá fótboltafélaginu Apulia Trani á Suður-Ítalíu

Tveir leikmenn Lengjudeildarliðs Gróttu hafa farið á síðustu dögum á lánssamningi til ítalska félagsins Apulia Trani.

Tinna Jónsdóttir og Sigrún Ösp Aðalgeirsdóttir ætla nefnilega báðar að spila fótbolta á Ítalíu í vetur.

Sigrún Ösp hafði áður tilkynnt um lánssamning sinn en nú hefur Tinna, sem er fyrirliði Gróttuliðsins, bæst í hópinn. Fótbolti.net segir frá þessu en þetta var staðfest á fésbókarsíðu ítalska félagsins eins og sjá má hér fyrir neðan.

Apulia Trani er í ítölsku C-deildinni og er frá borginni Trani sem er sunnarlega á Ítalíu við Adríahafið. Þetta er 54 þúsund manna borg og næsta stórborg er Bari sem er örlítið sunnar.

Tinna Jónsdóttir og Sigrún Ösp Aðalgeirsdóttir framlengdu báðar samning sinn við Gróttu áður en þær lögðu af stað í þetta ævintýri til Ítalíu. Tinna er 24 ára en Sigrún Ösp 25 ára.

Tinna Jónsdóttir er markahæsti leikmaður Gróttuliðsins í Lengjudeildinni í ár með 6 mörk í 15 leikjum. Tinna er uppalin Gróttukona og er líka leikjahæsti leikmaður félagsins með 74 leiki. Sigrún var á sínu þriðja tímabili með Seltjarnarnesliðinu en hún hóf ferilinn hjá Þór og Þór/KA.

Sigrún Ösp Aðalgeirsdóttir var í stuttu viðtali á fésbókarsíðu Gróttu á dögunum.

„Þetta gerðist allt mjög hratt. Það var haft samband við mig á þriðjudaginn í́ síðustu viku og fimm dögum siðar var búið að kaupa flugmiðann. Lengjudeildin er nánast búin og mér fannst spennandi að fá tækifæri til að spila fótbolta í öðru landi. Svo var tilhugsunin um að flytja til Suður-Ítalíu líka mjög heillandi. Það á eftir að koma í́ ljós hversu sterk C-deildin hér er miðað við fótboltann heima. Hvað sem því́ liður þá vona ég að ég geti hjálpað liðinu og komið reynslunni ríkari heim í Gróttu næsta vor" sagði Sigrún í viðtali fésbókarsíðu Gróttu.

Tinna Jónsdóttir ræddi líka við Gróttusíðuna eftir að félagsskiptin voru staðfest.

„Þetta á sér ekki langan aðdraganda. Félagið hafði samband við mig fljótlega eftir að Sigrún var komin út og eftir að hafa talað við hana og hugsað málið aðeins ákvað ég að slá til. Það er frábært tækifæri að búa í nýju landi og æfa fótbolta við aðrar aðstæður. Það var til dæmis mjög notalegt að vakna í sól og blíðu í morgun! En ég vona aðallega að þetta verði reynsla sem muni nýtast mér í framtíðinni, bæði inni á vellinum með Gróttu og annars staðar í lífinu",” sagði Tinna í viðtali fésbókarsíðu Gróttu.