Synjað um endurupptöku á skaðabótamáli United Silicon

Héraðsdómur Reykjaness hafnaði kröfu Magnúsar Ólafs Garðarssonar, stofnanda og fyrrverandi forstjóra United Silicon, á máli þar sem hann er sagður hafa verið dæmdur til að greiða þrotabúi kísilversins 1,2 milljarða króna í bætur.

Þrotabúið stefndi Magnúsi Ólafi til að greiða því meira en milljarða króna í bætur en United Silicon var úrskurðað gjaldþrota í janúar árið 2018 eftir að það lenti í miklum rekstrarvanda. Magnús Ólafur hefur verið sakaður um stórfelld fjársvik sem héraðssaksóknari hefur til rannsóknar. 

Í stefnu þrotabúsins var hann meðal annars sagður hafa millifært yfir milljarð króna af reikningum félagsins yfir á annað félag sem hann hafði yfirráð yfir og látið United Silicon greiða ólögmætar greiðslur til ýmissa aðila sem nemi jafnvel hundruð milljónum króna.

Magnús Ólafur var dæmdur bótaskyldur að sér fjarstöddum í Héraðsdómi Reykjaness 14. maí. Dómurinn hefur ekki verið birtur á dómstólavefnum en Ríkisútvarpið hefur eftir Geir Gestssyni, skiptastjóra þrotabúsins, að Magnúsi Ólafi hafi verið gert að greiða 1,2 milljarða króna í bætur auk vaxta.

Krafðist Magnús Ólafur endurupptöku á málinu en Héraðsdómur Reykjaness hafnaði því í dag. Vísaði dómurinn til þess að Magnús Ólafur hefði ekki lagt fram neitt um málsástæður sínar eða á hvaða réttarheimildum og sönnunargögnum krafa hans byggðist á umfram það að hann krefðist sýknu í bótamálinu.

Þarf Magnús Ólafur að greiða 350.000 krónur í málskostnað.