Fagnaðarfundir þegar ástvinir hittust í Leifsstöð eftir langa bið

Landamæri Íslands voru formlega opnuð ferðamönnum í dag og urðu fagnaðarfundirnir á Keflavíkurflugvelli. Skimun gekk vel en einum Bandaríkjamanni var vísað úr landi. Fyrsta flugvél lenti í morgun og meðal farþega var móðir sem hafði ekki hitt börnin sín síðan á jólunum.

Átta flugvélar lentu á Keflavíkurflugvelli í dag og með þeim komu rúmlega 600 farþegar.

„Klukkan er tuttugu mínútur í tólf og það eru tvær flugvélar lentar hér á Keflavíkurflugvelli. Von er á sex vélum til viðbótar í dag. Hér sjáum við farþega streyma út og allir bera þeir andlitsgrímur.“

Skimun á farþegum gekk heilt yfir vel í dag.

„Fólk sýnir þessu mikinn skilning þetta tekur auðvitað smá tíma. Hluti þeirra farþega sem komu í morgun voru ekki búnir að skrá sig fyrirfram sem tafði þeirra för,“ sagði Víðir Reynisson, yfirlögregluþjónn hjá Ríkislögreglustjóra.

Þeir sem höfðu forskráð sig þurftu einungis að bíða í um tvær mínútur.

Hafa einhverjir valið að fara frekar í sóttkí en að fara í sýnatöku? 

„Enginn ennþá,“ sagði Víðir.

Einum Bandaríkjamanni var þó vísað úr landi þar sem hann uppfyllti ekki kröfur til að fara yfir landamærin. Var hann sendur til Bretlands með sömu vél og hann kom.

Hefur ekki séð börnin sín síðan á jólunum

Kristín Hannesdóttir var á meðal þeirra farþega sem komu til landsins með fyrsta millilandafluginu í morgun.

„Ég er ekki búin a sjá börnin mín síðan á jólunum þannig ég er mjög spennt,“ sagði Kristín.

Hvernig er tilfinningin að vera komin heim? 

„Rosalega góð. Ég er alveg ótrúlega spennt,“ sagði Kristín.

Hvað er það fyrsta sem þú ætlar að gera þegar þú hittir börnin? 

„Knúsa þau og koma við þau og þurfa ekki að vera með grímu og hanska,“ sagði Kristín.

Starfsmaður flugvallarins er feginn að sjá líf á vellinum.

„Það kom okkur á óvart hvað það var mikið að gera á fyrstu vélunum þannig að við kvörtum ekki. Bara gaman að fá þetta af stað aftur. ,“ sagði Kristján Helgi Olsen Ævarsson.

Hvað er fólk helst að kaupa?

„Það er áfengið það klikkar aldrei. Fólk verður að nýta tollinn,“ sagði Kristján.

Ófáir fagnaðarfundir fóru fram á Keflavíkurflugvelli í dag þegar ástvinir hittust eftir langa bið.

Auður Þráinsdóttir hefur verið nánast innilokuð á Ítalíu í tvo mánuði.

„Ég nennti reyndar ekki að fara aftur í sóttkví. Ég er búin að vera alveg lokuð inni í tvo mánuði þannig að við bara komum núna. Það er bara yndislegt,“ sagði Auður Þráinsdóttir.

Hvernig er tilfinningin að vera komin heim til Íslands? 

„Bara æðisleg alltaf gott að koma heim,“ sagði Auður.

Gott að geta gengið um án andlitsgrímu

Ragnar er búsettur Í London. Þar er flest allt enn lokað og enginn fer neitt án þess að bera andlitsgrímu.

Þannig þú ert feginn að koma hingað og geta tekið af þér grímuna? 

„Algjörlega, er það ekki,“ sagði Ragnar Ingi Arnarsson.

Þú fórst í skimun?

„Já þeir tóku tvö sýni. Þeir tóku úr koki og nefi. Það var ekkert frábærlega þægilegt að taka úr nefinu. Það var eins og verið væri að pota alveg upp í auga. En þetta fylgir þessu,“ sagði Ragnar.

Hér ætlar hann að njóta sumarsins.

„Ætli ég fari ekki í Bláa lónið, það er víst afsláttur þar heyri ég,“ sagði Ragnar.