Enn sem komið er standa öll plön varðandi Eurovision

„Flottur fundur fararstjóra í Eurovision (Heads of Delegations) í Rotterdam. Það er mikill vinafundur enda höfum við mörg unnið í Eurovision í nokkur ár,“ segir Felix Bergsson í færslu á Facebook en hann verður fararstjóri íslenska Eurovision-hópsins í Rotterdam í maí. Felix og Rúnar Freyr Gíslason, fjölmiðlafulltrúi íslenska atriðisins, hafa verið síðustu daga á fundum ytra vegna Eurovision. 

Sendinefndirnar funduðu í upphafi vikunnar í Rotterdam og lögðu línurnar fyrir komandi Eurovision-keppni sem hefst eftir rétt rúma tvo mánuði. Vegna útbreiðslu kórónuveirunnar héldu nokkrar þjóðir sig heima en fylgdust þess í stað með gangi mála í gegnum fjarfundabúnað; eins og Grikkir, Svíar og Ísraelsmenn.

„Hollendingar tóku ákaflega vel á móti okkur sem mættum og Rotterdam sýndi sínar bestu hliðar. Gríðarlega spennandi suðupottur sem gaman verður að kynnast betur.“

Flottasta húsið

Felix og Rúnar hittu sjálfboðaliðana sem ætla að vinna með þeim í keppninni.

„Svona viðburður byggir á gríðarlega þéttu neti sjálfboðaliða sem skipta hundruðum. Hollenska þjóðin er algjörlega með í þessu gestaboði og sjálfboðaliðarnir okkar æðisleg. Við skoðuðum tónleikahöllina Ahoy sem er hreinlega flottasta hús fyrir þennan viðburð sem ég hef séð. Og hönnun á sviðinu, ljós og tækni almennt er geggjuð. Allar leiðir innanhúss eru stuttar og almenningssamgöngur með besta móti. Fullkomið,“ skrifar Felix.

Hann segir að fundurinn sjálfur hafi verið mjög vel skipulagður.

„Og troðfullur af upplýsingum sem ég ber heim til okkar fólks á RÚV. Ástandið vegna Covid 19 var auðvitað rætt en við treystum yfirvöldum og skipuleggjendum til að taka púlsinn á þeim málum og í augnablikinu er ekki verið að breyta plönum. Stefnan er enn sú sama - að gera magnað show sem gleður áhorfendur í Evrópu og út um allan heim. Við enduðum svo í matarboði borgarstjóra í ráðhúsi borgarinnar og fengum ljúffengt grænmetisfæði. Skemmtiatriðin voru stórkostleg og framkvæmd af nemendum í listaháskóla borgarinnar. Það var ákaflega vel til fundið.“