Borist fjöl­margar til­kynningar um veikindi sjó­far­enda

Álag á stjórnstöð Landhelgisgæslunnar hefur aukist síðustu daga og fjölmargar tilkynningar borist um veikindi sjófarenda.

Þyrlusveit Landhelgisgæslunnar náði í sýni til Vestmannaeyja um síðustu helgi og áhafnir loftfara Landhelgisgæslunnar eru til taks ef flytja þarf kórónuveirusmitaða á sjúkrahús í Reykjavík, er fram kemur í tilkynningu frá gæslunni.

Varðstjórar hafa að undanförnu verið milliliðir við hafnir, sóttvarnalækni, lögreglu og heilbrigðisyfirvöld á hverjum stað og leiðbeint áhöfnum báta og skipa vegna slíkra mála.

„Landhelgisgæslan verður vör við að áhafnir gæti fyllstu varúðar og séu varar um sig ef vart verður við veikindi um borð í skipum. Það er afar jákvætt að skipverjar séu á varðbergi ef grunur er um smit um borð.“

Þá eru varðstjórar stjórnstöðvar sagðir hafa staðið frammi fyrir ýmsum nýjum áskorunum sem krefjist aukins samstarf við fjölmarga aðila og að samstarfið hafi verið til fyrirmyndar.

Sjósókn umhverfis landið er sögð góð en um þrjú hundruð skip og bátar voru á miðunum klukkan níu í gærmorgun. Varðskipin Þór og Týr eru bæði við eftirlit á hafinu.