Jórunn Edda var í vél Wizz air: „Ekki sátt að fyrir­­­tækið hegði sér með þessum hætti“

„Ég er furðu hress í augnablikinu. Maður er búinn að vera mjög þreyttur og svo auðvitað peppaður að þessu ferðalagi sé loksins að ljúka,“ segir Jórunn Edda Helgadóttir sem var meðal farþega í annarri af tveimur vélum Wizz air sem lenda þurftu á Egilsstaðaflugvelli í gærkvöldi vegna slæms veðurs í Keflavík.

Jórunn Edda var stödd á BSÍ í Reykjavík þegar Vísir náði tali af henni. Rúta sem flutti hluta farþeganna frá Egilsstöðum var þá nýkomin í bæinn eftir margra klukkustunda ferðalag. „Maður er auðvitað ekki sáttur að fyrirtækið hegði sér með þessum hætti. Það er alls ekkert í lagi.“

Farþegarnir í tveimur vélum Wizz air sem lentu á Egilsstöðum, stóðu í gærkvöldi frammi fyrir að fljúga annað hvort aftur til Krakár í Póllandi strax um kvöldið eða þá fara frá borði á Egilsstöðum og bjarga sér sjálfir.

Wizz air meðvitað löngu fyrir lendingu

Lögmaður, sem hefur reynslu af málum tengdum bótarétti flugfarþega, segir að farþegar vélanna eigi ekki rétt á bótum í gegnum flugfélagið. Þeir gætu hins vegar átt rétt á bótagreiðslum í gegnum tryggingafélög. 

 

Jórunn segir að Wizz air vélarnar hafi skilið farþega eftir og svo flogið í burtu. „Það voru þarna einhverjar hótanir um tilkynningar og lagalegar aðgerðir ef maður myndi ekki skrifa undir eitthvað plagg áður en við fórum út úr vélinni,“ segir Jórunn.

Hún segir að farþegar fóru frá borði þurftu allir að sjá um sig sjálfir. „Það var kona þarna með tvö börn, sem var meðal farþega og sá til þess að flugstöðinni yrði að minnsta kosti ekki lokað. Það voru ekki nóg af bílaleigubílum fyrir alla. Á sama tíma var svo hægt að sjá á Facebook-síðu Wizz air að þeir vissu næstum tveimur og hálfum tíma fyrir lendingu að þeir myndu ekki lenda í Keflavík og hefðu þá getað fundið út úr þessu áður en við lentum. Við fengum ekki að frétta neitt fyrr en rétt fyrir lendingu.“

Jórunn Edda segir að starfsmenn flugvallarins hafi þó verið mjög almennilegir og liðlegir. „Það var þarna einhver farþegi sem tókst að redda rútu. Rútan átti að koma um hálf fimm um nóttina en það tafðist og vorum við ekki komin af stað fyrr en um klukkan 8 í morgun. Við vorum svo að lenda í Reykjavík, á BSÍ, núna um klukkan 18.“

Ekki í lagi að lenda í þessari óvissu

Aðspurð um ástandið á flugstöðinni í nótt segir hún að einhverjum hafi tekist að sofna.

„Við áttum von á rútunni um klukkan hálf fimm sem tafðist svo. Maður þurfti eitthvað að ráfa eitthvað um til skiptis, reyna að láta tímann líða. Ég er ekki manneskjan sem lenti verst í þessu. Það var móðir þarna að ferðast með tvö börn. Það er auðvitað ekki í lagi að hún lendi í þessari óvissu. Viti meira að segja ekki hvort hún fengi að vera áfram í flugstöðinni eftir að við fórum úr vélinni.“

Jórunn segir að einhverjir farþeganna hafi reddað sér með bílaleigubílum, smærri rútur sótt smærri hópa og svo hafi einhverjir komið úr höfuðborginni til að sækja sitt fólk á Egilsstöðum.