Þú gætir átt heima í nýju póstnúmeri um mánaðamótin

Íslandspóstur hefur ákveðið að gera breytingar á póstnúmerum, jafnt á Höfuðborgarsvæðinu sem og á landsbyggðinni. Flestar eru minniháttar, tilfæringar á landfræðilegum mörkum, en þeirra stærst er upptaka póstnúmersins 102 í Vatnsmýri Reykjavíkur. Þannig mun sá hluti póstnúmersins 101 sem er sunnan Hringbrautar breytast í póstnúmerið 102.

Í útskýringu Íslandspósts segir að sú breyting sé tekin að frumkvæði Reykjavíkurborgar, ekki síst í ljósi þess að mikil uppbygging fer nú fram á þessu svæði. Þrátt fyrir upptöku nýja póstnúmersins er áréttað að mörk fyrir póstnúmer 105 og 107 haldast óbreytt. Breytingarnar, sem eru útlistaðar betur hér að neðan, taka gildi um næstu mánaðamót.

Haft er eftir Herði Jónssyni, framkvæmdastjóra rekstrarsviðs Póstsins, í útskýringu Íslandspóst að talið hafi verið mikilvægt að bregðast við fyrrnefndri beiðni borgarinnar. „Einhverrar óánægju hefur gætt meðal íbúa á þessu svæði vegna breytingarinnar en ég vil taka það fram að breytingar á póstnúmerum hafa almennt ekki áhrif á viðskiptavini þegar kemur að dreifingu pakka og bréfa,“ áréttar Hörður.

Óttast áhrif á íbúðaverð

Ætla má að hann vísi m.a. til óánægju íbúa í Skerjafirði, sem hafa sett sig upp á móti upptöku póstnúmersins 102. Þeirra á meðal er borgarfulltrúinn Marta Guðjónsdóttir og íbúasamtök Skerjafjarðar, Prýðisfélagið Skjöldur. Þannig fullyrti félagið að yfirgnæfandi fjöldi Skerfirðinga vildi halda póstnúmeri 101.

Var vísað til þess að mikið væri undir fyrir íbúa að halda í póstnúmer 101 upp á húsnæðisverð. Þá væri breytingin algjörlega ótímabær þar sem flugvöllurinn væri ekki á förum í fyrirsjáanlegri framtíð.

Sem fyrr segir verða jafnframt gerðar nokkrar breytingar á póstnúmerum á landsbyggðinni. Helsti tilgangur þeirra er sagður að „afmarka sveitarfélög með sérstökum póstnúmerum og einfalda þannig flokkun og dreifingu.“ Nánar má fræðast um landfræðileg mörk póstnúmera með því að smella hér, en að neðan má sjá breytingarnar sem eiga sér stað þann 1. október næstkomandi.

Var	Verður	Póstáritun	Svæði	Lýsing/svæði/Annað
311	342	Stykkishólmur	Eyja og   Miklaholtshreppur	Verður   þjónustað frá Stykkishólmi
710	710	Seyðisfjörður	Seyðisfjörður	Minniháttar   lagfæring
108	105	Reykjavík	Reykjavík	Minniháttar   lagfæring  (Veðurstofa)
108	105	Reykjavík	Reykjavík	Minniháttar   lagfæring
105	103	Reykjavík	Reykjavík	Minniháttar   lagfæring
105	108	Reykjavík	Reykjavík	Minniháttar   lagfæring
110	113	Reykjavík	Reykjavík	PNR 113   mun fylgja Suðurlandsvegi
161	110	Reykjavík	Reykjavík	Dreifbýli   fyrir ofan Norðlingarholt (Bugðu)
203	206	Kópavogur	Kópavogur	Dreifbýli   sem tilheyrir  Kópavogi (Hellisheiði)
466	465	Bíldudalur	Bíldudalur	Minniháttar   lagfæring
101	102	Reykjavík	Reykjavík	Vatnsmýri og sá hluti póstnúmers 101 sem er sunnan   Hringbrautar breytist í póstnúmerið 102
801	801	Selfoss	Selfoss	Árborg verði   með 801 áfram
801	803	Selfoss	Selfoss	Flóahreppur
801	804	Selfoss	Selfoss	Skeiða   og Gnúpverjahreppur
801	805	Selfoss	Selfoss	Grímsnes   og Grafningshreppur
801	806	Selfoss	Selfoss	Bláskógabyggð
601	601	Akureyri	Akureyri	Akureyri   fyrir ofan Naustahverfi
601	604	Akureyri	Akureyri	Hörgársveit
601	605	Akureyri	Akureyri	Eyjafjarðarsveit
601	606	Akureyri	Akureyri	Svalbarðshreppur
601	607	Akureyri	Akureyri	Þingeyjasveit   (hluti)