Samfylkingarkarlar hámuðu í sig mömmumatinn hjá Meistara Magga

Matreiðslumeistarinn Magnús Ingi Magnússon, sem jafnan er kallaður Meistari Maggi eftir að hann gerði garðinn frægan sem sjónvarpskokkur á ÍNN, fékk hóp þingmanna úr röðum Samfylkingarinnar í heimsókn. Hann segir að þeir hafi verið alsælir með þann mömmumat sem hann er með á boðstólum á sínum nýja stað: Matarbarnum.

Logi Einarsson birti mynd af hópnum og Magga í miðjunni á Facebook-síðu sinni. Þar getur að líta Loga, Magga og þá Ágúst Ólaf Ágústsson, Guðmund Andra Thorsson og Guðjón S. Brjánsson. Logi lætur fylgja með glettinn texta, „Þegar kettirnir bregða sér frá fá mýsnar sér smá. „Þar sem þingkonur Samfylkingarinnar voru fjarverandi í dag höfðum við kallarnir fullt frelsi um hvar og hvað við borðum!“

Má af þessu helst skilja að það teljist forboðnir ávextir að lauma sér í eldhúsið til Magga en sennilega er það heillavænlegra en skunda á Klausturbar. Maggi segir þá, sem og aðra kunna vel að meta þann mömmu- eða heimilismat, sem hann er með á boðstólum. Og Samfylkingarkallar voru ekki matvandi að sögn Magga.

Hámuðu í sig lambakjötið

„Þeir töluðu við mig um leið og þeir vissu að ég var að opna og hafa verið lengi á leiðinni. „Það eru svo margir sem vilja fá svona mömmumat og heimilismat. Næsta miðvikudag verður saltkjöt sem ég salta sjálfur. En, þeir fengu sér það sem ég er með núna, lambakjöt í berníssósu, súrsætan kjúkling, og blandaða gratíneraða sjávarrétti í osti. Svo var ég með pólska kartöflumauksúpu og indverska karríkókossúpu.

 Þetta var heimalagað brauð með þessu og svo fengu þeir heimalagaða eplaköku og kaffi á eftir. Ég þurfti að gefa þeim sítrónusneið á eftir, þeir brostu svo mikið. Og ætluðu sér sannarlega að koma aftur.“ 

Hallur undir Trump og Miðflokkinn

Orðaflaumurinn stendur uppúr kokknum, svo ánægður var hann með þessa heimsókn. En, það koma vöflur á hann þegar hann er spurður hvort þetta séu mennirnir sem hann hafi kosið?

„Ég elska alla og sörvera alla.“

Meistari Maggi játar það, eftir að blaðamaður gengur á hann um hans pólitísku skoðanir að hann sé nú heldur hallur undir Trump og Miðflokkinn. Og hann hafi gaman að Boris, þessum þarna á Englandi. Meistari Maggi rifjar upp þegar hann setti upp mynd af Trump á sínum tíma á sínum stað og andskotinn varð laus.

„Ég fékk svakalegar bylgjur á móti mér og þurfti að biðja þjóðina afsökunar. Samt var hann kosinn og verður kosinn aftur, það er enginn sem á roð í hann,“ segir Maggi og upplýsir að hann sé helst hrifinn af yfirlýsingaglöðum mönnum. Og ekki var rædd pólitík hjá Magga í dag.

„Neinei, en ég sagði þeim að skemmtilegasti þingmaðurinn sem ég hef kynnst um dagana er Össur Skarphéðinsson, stórvinur minn. Hann kom oft til mín að borða, sem ráðherra og með lífverði, flottur karl og skemmtilegur.“