Tugir látnir eftir rútuslys á Indlandi

Hið minnsta 44 eru látin og tugir slasaðir eftir að rútu var ekið ofan í gljúfur á Indlandi í gær. Rútan er sögð hafa verið yfirfull, sumir farþegar hafi jafnvel setið á þaki rútunnar og lýsa vitni því hvernig ökumaður hennar virðist hafa misst stjórn á bílnum, sveigt út af veginum og ofan í djúpt gilið. Slysið átti sér stað í Himachal Pradesh, héraði í norðurhluta Indlands sem telst til Himalajafjalla, hæsta fjallgarðs í heimi.

Lögreglustjóri á svæðinu segir í samtali við AFP að þorri farþega hafi verið konur og börn sem voru á heimleið eftir vinnu og skóla.

Forsætisráðherra Indlands, Narendra Modi, vottaði aðstandendum hinna látnu samúð sína á samfélagsmiðlum og sagðist vona að hinum slösuðu yrði hjúkrað til heilsu sem fyrst.

Umferðarslys eru daglegt brauð á Indlandi og í Himachal Pradesh einu rötuðu 30 þúsund umferðaróhöpp á borð lögreglu á árunum 2009 til 2018. Samkvæmt Times of India létust 11 þúsund manns í indversku umferðinni á því árabili og um 54 þúsund særðust.

Deeply saddened by the bus accident in Kullu. Condolences to the families of those who lost their lives. I hope the injured recover soon. The Himachal Pradesh Government is providing all possible assistance that is required: PM @narendramodi

— PMO India (@PMOIndia) June 20, 2019