Mariam nýr sölu- og markaðsstjóri Tulipop

Mariam Laperashvili hefur verið ráðin til Tulipop og mun hún gegna stöðu sölu- og markaðsstjóra hönnunarfyrirtækisins. Mariam kemur frá framleiðslufyrirtækinu Sagafilm þar sem hún hefur starfað sem markaðsstjóri frá 2016.

Í tilkynningu frá Tulipop segir meðl annars að Mariam muni stýra þátttöku fyrirtækisins í þeim erlendu sýningum sem Tulipop mun taka þátt í á árinu. Það gerði hún til að mynda á sýningunni WonderCon sem fram fór í Kaliforníu á dögunum.

Þá er jafnframt drepið á ferli Mariam, sem sögð er hafa komið víða við í störfum sínum við sölu- og markaðsstjórn. Til að mynda starfaði hún um skeið sem markaðsstjóri hjá WorkAmerica í Washington D.C., en Mariam starfaði auk þess í markaðsrannsóknum fyrir National Geographic í sömu borg. Síðastliðin þrjú ár hefur Mariam starfað sem markaðsstjóri Sagafilm á Íslandi þar sem hún stýrði markaðssetningu á framleiddu efni fyrirtækisins, bæði innanlands og erlendis.

Hún er viðskiptafræðingur að mennt með B.Sc. gráðu frá Háskóla Íslands, auk þess sem hún sérhæfði sig í markaðsfræði í George Washington University í Washington D.C.

Í tilkynningunni er auk þess haft eftir Helgu Árnadóttur, framkvæmdastjóra og öðrum stofnenda Tulipop, að þau séu spennt að fá Mariam til liðs við fyrirtækið - „til að sinna vaxandi áhuga alþjóðlegra kaupenda og leiða þá uppbyggingu innan félagsins.“