Hrekur fullyrðingar stjórnarformanns um að búið sé að gera upp við Slayer

Lögmaður umboðsaðila rokkhljómsveitarinnar Slayer segir það ekki rétt að aðstandendur tónlistarhátíðarinnar Secret Solstice hafi þegar gert upp við sveitina, líkt og stjórnarformaður Live Events, fyrirtækisins sem nú sér um rekstur hátíðarinnar, heldur fram.

Þá hafi verið ákveðið að stefna Live Events vegna ummæla framkvæmdastjórans í fjölmiðlum þess efnis að fyrirtækið myndi greiða öllum listamönnum frá hátíðinni sumarið 2018. Haft hefur verið eftir framkvæmdastjóranum að Slayer-málið sé fyrirtækinu alveg óviðkomandi.

Tíu milljóna skuld við borgina

Greint var frá því um helgina að bandaríska rokkhljómsveitin Slayer, sem var eitt aðalnúmera á Secret Solstice í fyrra, hefði stefnt hátíðinni fyrir að hlunnfara sig um sextán milljónir króna, eða 133 þúsund Bandaríkjadali.

Fyrirtækið Solstice Productions hefur farið með rekstur hátíðarinnar undanfarin ár, nú síðast í fyrra. Annað fyrirtæki, Live Events, tók svo við rekstri hátíðarinnar í haust og fyrir liggja drög að nýjum samningi við Reykjavíkurborg. Samningurinn er óundirritaður. Umboðsaðili Slayer stefndi báðum fyrirtækjum vegna vanefnda en áður hefur komið fram að fjöldi fólks og fyrirtækja hafi ekki fengið greitt fyrir vinnu sína hjá Solstice Productions.

Sjá einnig: Útskýrir tilboð til Reykjavíkurdætra og lofar uppgjöri við listamenn

Í kvöldfréttum RÚV í gær kom svo fram að Secret Solstice skuldi borginni um tíu milljónir sem gera verði upp svo hægt verði að halda hátíðina í ár, að sögn Þórdísar Lóu Þórhallsdóttur formanns borgaráðs.

Til stendur að Secret Solstice verði haldin helgina 21.-23. júní næstkomandi en þegar hefur verið tilkynnt um að heimsfrægir tónlistarmenn á borð við Black Eyed Peas, Rita Ora, Patti Smith og Pussy Riot komi fram á hátíðinni.

 

Hefur gengið á ýmsu

„Það er bara verið að vinna á fullu í því að halda hátíðina. Og þetta hefur verið bara eins og undanfarin ár, það hefur gengið á ýmsu sýnist mér,“ segir Guðmundur Hreiðarsson Viborg, stjórnarformaður Live Events, í samtali við Vísi, inntur eftir því hver staðan sé á Secret Solstice.

Þá segir Guðmundur að misskilnings gæti í sambandi við greiðslur vegna hátíðarinnar í fyrra annars vegar og í ár hins vegar. Hann ítrekar í því samhengi að annað fyrirtæki, Solstice Productions, hafi haldið hátíðina síðasta sumar líkt og árin á undan.

Þá fullyrðir Guðmundur að fyrirtækið sem haldið hafi hátíðina í fyrrasumar hafi gert upp við Slayer strax í fyrra. Greiðslukvittanir séu til því til sönnunar. Aðspurður segist hann þó ekki geta útvegað umræddar kvittanir þar sem hitt fyrirtækið hafi séð um greiðsluna.

Að öðru leyti vísar Guðmundur á Víking Heiðar Arnórsson, framkvæmdastjóra Secret Solstice, vegna fyrirspurna um hátíðina. Vísir hefur sent Víkingi skriflega fyrirspurn vegna málsins en hann baðst undan viðtali og óskaði eftir fyrirspurn í staðinn. Von er á svörum í dag eða á morgun.

Stefndu Live Events vegna yfirlýsinga framkvæmdastjórans í fjölmiðlum

Eins og áður segir hefur umboðsaðili Slayer stefnt báðum félögum, Live Events og Solstice Productions, vegna vangoldinna launa. Í frétt RÚV um málið kom fram að gengið hefði erfiðlega að hafa uppi á aðstandendum hátíðarinnar í fyrra, þ.e. stjórnendum Solstice Productions, og birta þeim stefnuna.

Jón Gunnar Ásbjörnsson, lögmaður umboðsaðila Slayer, staðfestir í samtali við Vísi að náðst hafi í stjórnendur fyrirtækisins og því sé nú búið að birta báðum fyrirtækjum stefnu. Fréttastofa hefur ekki náð í Friðrik og Katrínu Ólafsson, fyrrverandi stjórnendur hátíðarinnar, vegna málsins þrátt fyrir ítrekaðar tilraunir undanfarnar vikur og mánuði.

RÚV hafði þó eftir Víkingi Heiðari að Slayer-málið væri Live Events alveg óviðkomandi. Jón Gunnar segir í samtali við Vísi að Live Events hafi verið stefnt vegna þess að Víkingur Heiðar hafi sjálfur lýst því yfir í fjölmiðlum að fyrirtækið myndi borga öllum listamönnum sem Solstice Productions náði ekki að gera upp við frá síðustu hátíð.

Þá segir Jón Gunnar að fullyrðingar stjórnarformanns Live Events um að þegar hafi verið gert upp við Slayer séu ekki réttar. Stjórnendur hátíðarinnar í fyrra hafi ekki borgað eftirstöðvar af kröfum Slayer, þ.e. þann hluta upphæðarinnar sem ekki var greiddur fyrir fram eins og um var samið, þrátt fyrir að gengið hefði verið á eftir þeim um greiðslu.

Umboðsaðili Slayer á Íslandi hafi því á endanum gert upp við hljómsveitina og sé nú að innheimta kröfurnar í eigin nafni.