Forseti Alsír snúinn heim þar sem mótmæli bíða hans

Abdelaziz Bouteflika, forseti Alsír, sem gefið hefur út að þrátt fyrir heilsuvandamál sín ætli hann að gefa kost á sér í komandi forsetakosningu, er kominn aftur til landsins eftir að hafa dvalið á svissnesku sjúkrahúsi síðustu tvær vikur. AP greinir frá.

Fjölmenn mótmæli hafa verið haldin í Algeirsborg og víðar í landinu og krefjast mótmælendur þess að Bouteflika bjóði sig ekki fram að nýju.

Lítið hefur borið á forsetanum frá því að hann fékk heilablóðfall árið 2013 og telja andstæðingar hans Bouteflika vera lepp fyrir raunverulega ráðamenn landsins, sem koma úr röðum hátt settra borgara og hermanna.