Versti stormur í áratugi skellur á taílenskum ferðamannastöðum

Hitabeltisstormurinn Pabuk veldur nú usla á sunnanverðu Taílandi með úrhellisrigningu og hvassviðri. Veðurfræðingar spá því að stormurinn verði sá versti sem fer yfir svæðið í þrjátíu ár. Vinsælir ferðamannastaðir eru á leið stormsins.

Þúsundir manna hafa yfirgefið eyjarnar Koh Samui, Koh Tao og Koh Phangan, að sögn breska ríkisútvarpsins. Yfirvöld hafa mælt með því að fólk haldi sig innandyra þar til á morgun. Þau segjast vel undirbúin fyrir storminn.

Ferðamenn sem BBC hefur rætt við á Koh Samui segja að þar sé úrhellisrigning, sterkur vindur og öldungangur. Rafmagn hefur einnig slegið út þar.

Búist er við því að stormurinn veikist þegar hann fer úr Taílandsflóa yfir í Andamanhaf vestan við Taíland.