Einn látinn eftir að lest fór út af sporinu nærri Barcelona

Einn maður lét lífið og fjöldi slasaðist þegar lest fór úr af sporinu nálægt spænsku borginni Barcelona í morgun.

Tveir af vögnum lestarinnar fóru út af sporinu skömmu eftir klukkan sex í morgun að íslenskum tíma, nærri Vacarisses, um 45 kílómetrum norðvestur af Barcelona. Lestin var á leið milli borganna Terrassa og Manresa.

Talsmaður lestarfélagsins Renfe sagði aurskriðu um að kenna, en mikil úrkoma hefur verið á svæðinu síðustu daga.

Í frétt Sky segir að fimm manns hafi verið fluttir á sjúkrahús vegna slyssins. Þá hafi á fimmta tug manna slasast lítillega.

Alls voru 131 maður um borð í lestinni þegar slysið varð.