Samruni Haga og Olís samþykktur

Samkeppniseftirlitið samþykkti í dag að skilyrði sem það setti fyrir samruna Haga, Olís og fasteignafélagsins DGV hefðu verið uppfyllt. Hagar greiða 10,6 milljarða króna fyrir Olís og DGV en  samþykki Samkeppniseftirlitsins voru háð skilyrðum sem var ætlað að ryðja samkeppnishindrunum úr vegi.

Um eitt og hálft ár er liðið frá því að kaupsamningar um viðskiptin voru undirritaðir. Hagar gerðu sátt við Samkeppniseftirlitið í september. Hún fól meðal annars í sér að Hagar þurftu að selja þrjár dagvöruverslanir sínar, dagvöruhluta verslunar Olís í Stykkishólmi og fimm eldsneytisstöðvar Olís.

Skilyrði var um að hæfur kaupandi fyndist að eignunum sem væri líklegur til að veita Högum samkeppni. Hagar sömdu í kjölfarið við Atlantsolíu um kaup á eldsneytisstöðvunum og við Ísborg ehf. um kaup á dagvöruverslununum.

Að undangenginni frekari athugun féllst Samkeppniseftirlitið á að Atlantsolía uppfyllti skilyrði sáttarinnar en óskað var frekari gagna vegna Ísborgar. Í kjölfar þeirrar athugunar komst Samkeppniseftirlitið að þeirri niðurstöðu að Ísborg uppfyllti ekki kröfur um hæfi kaupanda eignanna.

Ástæðan var meðal annars efasemdir um Ísborg væri óháð Högum, einkum vegna tengsla fyrirsvarsmanns Ísborgar við óbeinan hluthafa í Högum. Að mati Samkeppniseftirlitsins girða umrædd tengsl ekki fyrir viðskiptin.

„Í ljósi framangreinds er samrunaaðilum nú heimilt að framkvæma fyrrgreindan samruna Haga og Olís,“ segir í tilkynningu Samkeppniseftirlitsins.