Bændur gegn brú yfir Þorskafjörð og segja að bújörðum yrði fórnað

Stórbrú þvert yfir mynni Þorskafjarðar í stað vegar um Teigsskóg mætir harðri andstöðu eigenda fjögurra bújarða í Reykhólasveit. Þeir segja sorglegt að orðið sáttaleið sé notað um þessa tillögu, hún spilli túnum og æðarvarpi en einnig votlendi, fuglalífi og birkikjarri. Rætt var við bændur á Stað í Reykhólasveit í fréttum Stöðvar 2. 

Deilurnar um Teigsskóg og framtíðarlegu Vestfjarðavegar um Gufudalssveit tóku óvænta stefnu í sumar þegar kynnt var sem sáttaleið tillaga norskrar verkfræðistofu um veg þvert yfir mynni Þorskafjarðar með áttahundrað metra langri brú, kölluð R-leið, og var fullyrt að hún myndi kosta svipað.

Því fer þó fjarri að hún teljist sáttaleið. 

„Nei, það er engin sátt um R-leið í Reykhólahreppi,“ segir Kristján Þór Ebeneserson, bóndi á Stað í Reykhólasveit. 

„Og þetta er bara sorglegt að okkar mati að þeir skyldu voga sér að nota þetta orð,“ segir Rebekka Eiríksdóttir.

Tillagan þýddi að Vestfjarðavegur færi í gegnum fjórar bújarðir, sem allar eru nýttar, Stað og Árbæ á Reykjanesi, en einnig jarðirnar Berufjörð og Skáldstaði í botni Berufjarðar en þrjár þessara jarða eru í eigu Staðarbænda.

„Við höfum auðvitað bara áhyggjur af okkar framtíð. Þetta er í rauninni framtíðarbreyting á öllu hér og allt óafturkræft. Af því að við erum með fullt af ræktuðu landi og við erum með æðarvarp fyrir neðan. Og það er alveg sama hvort verður tekið af okkur, það verður alltaf geysilegt tjón fyrir okkur,“ segir Rebekka.

En jafnframt sé gert ráð fyrir að leggja veginn yfir ósnortna náttúru. 

„Hér er gríðarlegt votlendi og fuglalíf, - og hríslur og fleira í Berufirði og Skáldstöðum, sem við getum ekki ímyndað okkur annað en að þurfi að skoða eitthvað betur. 

Við ætlum kannski ekki að segja að það sé betra að eyðileggja annarra manna land. En við vitum allavega hver skaðinn okkar er,“ segir hún. 

„Og það er þó allavega búseta hér. Það er engin búseta á Hallsteinsnesi eða Grónesi,“ segir Kristján Þór en Teigsskógarleiðin færi um þær jarðir.

Þá gera þau athugasemd við að Reykhólahreppur skyldi taka við fimm milljóna króna styrk frá Hagkaupsbræðrum til að kosta norsku skýrsluna. 

„Já, það er alveg magnað og helvíti hart að við þurfum að fara að eyða sauðfjárinnlegginu okkar til að verja okkur á meðan sveitarfélagið þiggur styrki frá auðmönnum,“ segir Kristján.

Þau Kristján og Rebekka krefjast nýs umhverfismats og segjast klárlega ætla að nýta sér allar mögulegar kæruleiðir, verði reynt að fara R-leiðina.

„Þetta er líka svolítið sorglegt að sveitarstjórn skuli vera að taka afstöðu gegn íbúum, en afstöðu með einhverjum birkihríslum,“ segir Kristján.

„Af því að við þurfum auðvitað öll að standa saman í svona litlu samfélagi,“ segir Rebekka.

Hér má sjá frétt Stöðvar 2: