Sumarspá Siggu Kling – Bogmaðurinn: Mátt svo sannarlega skipta um skoðum

Elsku Bogmaðurinn minn, það er svo dásamlegt að hlusta á þig tala og þú ert svo dásamlegur penni ef þú nenntir að skrifa og betri hlustanda er ekki hægt að finna. Þú hefur einstakt eðli til að læra tungumál og ég segi að þetta sé það mikilvægasta sem þú getur, þú þarft svo stuttan tíma til að breyta lífi þínu í eitthvað svo nýtt og spennandi og það er svo mikilvægt þú skiljir að þú ert ekki tré, en tré eru samt sem áður svo greind.

Það hefur komið í ljós að þau hafa samskipti með rótum sínum, hafa mjög flókin og spennandi samskiptatengsl, en geta ekki fært sig úr stað nema með hjálp annarra.

Ef þér finnst núna þú sért alveg uppgefin og engin orka í umhverfinu þínu ertu á vitlausum stað, hvort sem er vinna, skóli eða heimili. Það sem er svo dásamlegt er að þú mátt svo sannarlega skipta um skoðum ef þér finnst það eiga við og það er svo algengt að karakterinn þinn vill hafa svo margar háskólagráður en veit samt ekkert hvert hann vill fara eða hver hann vill vera.

Mikilvægasta háskólagráðan þín er fjölskylduháskólagráðan og þú hefur það einstaka eðli að vera dásamlegt foreldri. Eftir því sem þú eignast fleiri börn og stærri fjölskyldu, því hamingjusamari verðurðu. Það fer ekki endilega eftir blóðtengslum hver fjölskyldan þín er, svo gefðu allt þitt í þau tengsl sem þú vilt hafa.

Þú hefur svo sterka náðargáfu sem sálfræðingur og með þeim hæfileikum áttu eftir að gera líf þitt léttara og hjálpa þeim sem þú elskar. Þú hefur svo frjálsan huga, en ef þú reynir að festa þig í excel eða í ferköntuðum reglum þá deyrðu, svo láttu engan fanga þennan dásamlega frjálsa huga þinn, en margir munu reyna. Þetta er mjög spennandi sumar sem þú ert að fara inn í en legðu allt undir því þá færð þú hæsta vinninginn.

Knús og faðmlag, þín Sigga Kling

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt, Kjartan Kjartansson athafnamaður.