Stuðningsfulltrúinn neitaði sök

Stuðningsfulltrúi sem sætir ákæru fyrir kynferðisbrot gegn fjórum börnum neitaði sök þegar sakirnar voru bornar upp á hann við þingfestingu málsins í Héraðsdómi Reykjaness í morgun. Verjandi fulltrúans, Arnar Kormákur Friðriksson, staðfestir þetta í samtali við fréttastofu.

Fulltrúinn, sem er á fimmtugsaldri, hefur setið í gæsluvarðhaldi síðan í janúar, lengst af á grundvelli almannahagsmuna, en hann er ákærður fyrir ítrekuð og langvarandi kynferðisbrot gegn börnum og fyrir nauðganir. Brotin geti varðað allt að sextán ára fangelsi.

Þá var gæsluvarðhald yfir stuðningsfulltrúanum framlengt til 8. júní. Stefnt er á að aðalmeðferð í málinu hefjist um mánaðarmótin maí/júní.

Brotin hafi byrjað í sturtunni

Fórnarlömb hans hafa sum hver stigið fram og lýst brotum mannsins. Einn, sem er tvítugur í dag, segir fulltrúann hafa brotið á sér frá því hann var átta ára og til fjórtán ára aldurs. Fulltrúinn hafi sannfært sig um að segja engum frá.

„Eftir að þú ert búinn að vinna inn traust hjá einhverjum þá er maður ekki endilega að fara segja frá strax. Ekki fyrr en maður er orðinn aðeins þroskaðari til að skilja hvað hann gerði,“ sagði fórnarlambið og lýsti aðferðum mannsins.

„Hann leyfði mér að spila tölvuleiki eins og ég vildi, velja í matinn, gefa mér pening. Þetta byrjaði fyrst í sturtunni þar sem hann byrjaði að kenna mér að þrífa sjálfan mig. Svo leiddist þetta út í meira. Ég var bara barn á þeim tíma og vissi ekkert hvað var í gangi í raun og veru.“

Stuðningsfulltrúinn starfaði um árabil með börnum hjá Barnavernd Reykjavíkur. Meint brot hans beinast ekki að börnum sem hann starfaði með heldur sem hann kynntist í gegnum fjölskyldu eða vini.