Ætla að freista þess að fá fóstureyðingarlögunum hnekkt

Samtök um mannréttindi og rétt kvenna til fóstureyðinga hafa höfðað mál gegn ríkisstjóra Iowa en með lögsókninni freista samtökin þess að fá nýrri og hertri fóstureyðingarlöggjöf Repúblikana í ríkinu hnekkt. Með lögunum verða fóstureyðingar eftir sex vikna meðgöngu bannaðar í Iowa og löggjöfin því sú strangasta sinnar tegundar í Bandaríkjunum.

Mannréttindasamtök sem berjast fyrir rétti kvenna til fóstureyðinga og aðgengi þeirra að heilbrigðisþjónustu, þar á meðal samtökin The American Civil Liberties Union of Iowa og Planned Parenthood Federation of America, eiga aðild að kærunni en tilkynnt var um hana í dag.

Sjá einnig: Iowa stefnir að ströngustu fóstureyðingarlögum Bandaríkjanna

Í kærunni er því haldið fram að lögin brjóti í bága við stjórnarskrá Iowa-ríkis á grundvelli þess að þau banni nær allar fóstureyðingar og stofni þannig heilsu kvenna í hættu. Stefnendur ætla því að freista þess að fá lögunum hnekkt en málarekstur gæti tekið nokkur ár. Þa hefur lögfræðistofa í ríkinu nú þegar boðist til þess að flytja málið fyrir hönd samtakanna án endurgreiðslu.

Frumvarpið, sem hefur verið umdeilt, var samþykkt í þinginu í Iowa í byrjun þessa mánaðar og degi síðar skrifaði ríkisstjórinn, repúblikaninn Kim Reynolds, undir það.

Ef lögin taka gildi þann 1. júlí næstkomandi eins og áætlað er verður konum í Iowa framvegis bannað að fara í fóstureyðingu eftir að hjartsláttur finnst í fóstri. Það gerist iðulega eftir um sex vikna meðgöngu.

Þannig hafa andstæðingar laganna haldið því fram að með þeim sé í raun verið að gera konum nánast ómögulegt að rjúfa þungun þar eð margar þeirra vita ekki af henni fyrr en þær eru komnar lengra en sex vikur á leið.