Leita breskrar stúlku sem hvarf í Þýskalandi fyrir 37 árum

Leit stendur nú yfir að breskri stúlku sem hvarf í Þýskalandi fyrir 37 árum. Faðir stúlkunnar segir það martraðarkennt að snúa aftur á staðinn þar sem dóttir hans hvarf og gagnrýnir bresk stjórnvöld fyrir að hefja rannsókn á hvarfi hennar að nýju.

Ekkert hefur spurst til hinnar bresku Katrice Lee síðan hún varð viðskila við móður sína, Sharon, í Naafi-stórmarkaði í grennd við þýsku borgina Paderborn þann 28. nóvember 1981. Katrice átti tveggja ára afmæli þann dag. Lee-fjölskyldan var búsett í Þýskalandi þar sem Richard, faðir Katrice, starfaði fyrir breska herinn en Richard og Sharon hafa ávallt haldið því fram að Katrice hafi verið rænt.

Í grænum bíl á brú yfir Alme-ána

Leitin að Katrice hófst að nýju á mánudag við Alme-ána í vesturhluta Þýskalands. Um hundrað manns standa að leitinni en gert er ráð fyrir að leitað verði í fimm vikur.

Leit beinist að Alme-svæðinu vegna þess að daginn sem Katrice hvarf sást til karlmanns halda á barni, sem svipaði til Katrice, í grennd við Naafi-stórmarkaðinn. Daginn eftir sást til sama manns þar sem hann hafði lagt grænum bíl á brú yfir Alme-ána.

 

Martraðarkennt að vera kominn aftur

Rannsókn á hvarfi Katrice hefur verið umdeild en árið 2012 játaði lögregla á sig mistök við framkvæmd hennar. Landamæraverðir voru t.d. ekki látnir vita af hvarfi Katrice og heilar sex vikur liðu frá því að Katrice hvarf og þangað til skýrslur voru teknar af starfsfólki stórmarkaðarins.

Rannsókninni var því hrint af stað að nýju 2012 fyrir tilstilli breska varnarmálaráðuneytisins. Richard, faðir Katrice, hefur verið mjög andvígur því að hvarf dóttur hans sé nú rannsakað aftur. Hann hefur sagt rannsóknina til þess gerða að halda upplýsingum um hvarfið leyndu fyrir fjölskyldunni.

Richard vitjaði leitarinnar í Þýskalandi í vikunni og sagði það martraðarkennt að vera kominn aftur. „Þetta er skelfilegt, alveg skelfilegt. Þetta er afturhvarf til martraðar minnar,“ tjáði Richard blaðamanni BBC í vikunni. Þá hefur hann ekki trú á því að Katrice finnist við leitina en sagðist hafa snúið aftur á leitarsvæðið til að heiðra minningu hennar.

Gert er ráð fyrir að frekari upplýsingar um leitina verði birtar á blaðamannafundi í dag, að því er fram kemur í frétt breska ríkisútvarpsins.