Framsókn og óháðir í eina sæng í Hafnarfirði

Framsóknarflokkurinn í samstarfi við óháða hefur kynnt lista sinn í Hafnarfirði fyrir komandi sveitarstjórnarkosningar. Ágúst Bjarni Garðarsson, aðstoðarmaður Sigurðar Inga Jóhannssonar samgönguráðherra, er oddviti og verður stefnuskrá framboðsins kynnt fljótlega að því er segir í tilkynningu frá flokknum.

Markmiðið með þessum öfluga lista er að ná til allra bæjarbúa með því að stilla upp fjölbreyttum hópi fólks með ólíkan bakgrunn, reynslu og þekkingu á því sem skiptir bæjarbúa máli. Framboðið er tilbúið að vinna með öllum stjórnmálaflokkum að betri bæ.

Kosningar til sveitarstjórna fara fram þann 26. maí.

Meðal þess sem Framsókn og óháðir ætla að vinna að fyrir fólk í Hafnarfirði:

-Börn komist inn á leikskóla við 12 mánaða aldur. Það þarf að hlúa að starfsmönnum leikskóla með því að viðurkenna það álag sem fylgir starfinu og greiða fyrir viðveru starfsmanna með börnum í hádegi.

-Bæta akstursþjónustu fyrir eldri borgara og efla þannig félagslíf þeirra og auka aðgengi að afþreyingu.

-Fríar skólamáltíðir fyrir börn á grunnskólaaldri.

-Auðvelda einstaklingum að eignast húsnæði með því að lækka lóðaverð.