Nær Bisping að stöðva Hollywood-endurkomu Georges St. Pierre?

UFC 217 fer fram í nótt í Madison Square Garden, New York. Einn besti bardagamaður allra tíma snýr þá aftur eftir fjögurra ára hlé og reynir fyrir sér í nýjum þyngdarflokki.

Þeir Michael Bisping og Georges St. Pierre eigast við í aðalbardaga kvöldsins á UFC 217. Georges St. Pierre var um árabil ríkjandi meistari í veltivigt en eftir umdeildan sigur á Johny Hendricks í nóvember 2013 ákvað hann óvænt að taka sér hlé frá íþróttinni.

St. Pierre hélt beltinu í 2064 daga og var orðinn þreyttur á pressunni sem fylgdi því að vera meistari. Þar að auki fannst honum lyfjaeftirlitið í UFC vera ábótavant.

Nú, 36 ára gamall, hefur hann aftur fundið hungrið sem hann vantaði í svo mörg ár og er lyfjaeftirlitið í UFC í dag með því besta sem þekkist. Hann hefur því ákveðið að snúa aftur en í þetta sinn í millivigt.

St. Pierre hefur aldrei barist í millivigt en þegar bardaginn var fyrst tilkynntur kvaðst St. Pierre vera með stór áform og var millivigtartitillinn bara fyrsta púslið. Meira vildi hann ekki greina frá áformum sínum fyrr en að bardaganum loknum.

Saga St. Pierre er í raun klassísk saga sem mætti jafnvel sjá fyrir sér sem Hollywood kvikmynd. Hann ólst upp í smábæ í Kanada og var snemma lagður í einelti í skólanum. Hann var auðvelt fórnarlamb enda lítill og varnarlaus á þeim tíma.

Hann fór þó að læra karate til að læra að verja sig og þegar hann gat loksins svarað fyrir sig hætti eineltið. Karate fangaði hug hans á unglingsárum en þegar hann sá fyrstu UFC keppninna vissi hann hvert hann ætlaði að stefna. Hann ætlaði að verða besti bardagaíþróttmaður í heimi og það tókst honum.

St. Pierre varð fyrst veltivigtarmeistari í nóvember 2006. Líkt og hjá sjálfum Rocky Balboa missti nýkrýndi meistarinn sjónar á því sem raunverulega skipti máli og eyddi hann of miklum tíma á skemmtanalífinu. Það kom honum svo um koll þegar hann tapaði í sinni fyrstu titilvörn og var það dýrmæt lexía.

St. Pierre varð upp frá því fullkomin bardagavél sem vann 12 bardaga í röð. Í kvöld snýr hann aftur eftir fjögurra ára hlé og á hann erfitt verk fyrir höndum gegn millivigtarmeistaranum Michael Bisping. Bretinn kjaftfori er stærri en St. Pierre og gæti þetta orðið langt kvöld fyrir St. Pierre. Það væri þó dæmigerður endir á Hollywood kvikmyndinni ef St. Pierre tekst hið óvænta og sigrar Bisping.

Takist honum ætlunarverkið sitt yrði hann einn af fáum sem vinnur belti í tveimur mismunandi þyngdarflokkum en aðeins Randy Couture, B.J. Penn og Conor McGregor hafa leikið það eftir.

Michael Bisping er þó alveg sama um fallegan endi á Hollywood kvikmynd og ætlar svo sannarlega ekki að láta beltið af hendi auðveldlega. Bisping er talinn sigurstranglegri af veðbönkum og verður afskaplega spennandi að sjá gamla veltivigtarkónginn aftur í búrinu.

UFC 217 verður í beinni útsendingu á Stöð 2 Sport í nótt en bein útsending hefst kl 2.