Hefur sett Íslandsmet á fimm heimsmeistaramótum í röð

Sund Hún blómstrar oftast á stóra sviðinu og það er góður hæfileiki að hafa fyrir íþróttamann. Sundkonan Hrafnhildur Lúthersdóttir náði enn einu sinni að bæta sig á heimsmeistaramóti um helgina og hélt því við hinni frábæru hefð að bæta sig þegar þær bestu í heimi koma saman.

Hrafnhildur kom í mark í undanúrslitasundinu á 30,71 sekúndu og bætti þar með verðlaunasund frá því á EM í London 2016. Hrafnhildur synti á 30,83 sekúndum á EM fyrir rúmu ári sem skilaði henni silfurverðlaunum. Að þessu sinni var Hrafnhildur 23 hundraðshlutum frá því að komast inn í úrslitasundið.

Rosalega gaman



„Þetta var rosalega gaman. Ég vildi að minnsta kosti bæta mig af því að það er náttúrulega alltaf gaman að bæta sig og setja Íslandsmet og ekki sakar það að gera það á svona stóru og flottu móti og í sjónvarpinu,“ sagði Hrafnhildur kát með árangurinn.

„Þetta var virkilega sterkt mót í ár og stærsta heimsmeistaramótið í sögunni. Þannig að vera tíunda best í heiminum í ár eftir rosalega gott ár í fyrra þá get ég ekki annað en verið sátt og ánægð með þennan árangur,“ sagði Hrafnhildur. Hún komst í úrslit á Ólympíuleikunum í fyrra.

Alls hefur Hrafnhildur sett ellefu Íslandsmet á heimsmeistaramótum og þau hafa komið í fjórum greinum. Metið í 50 metra bringu var hennar fimmta í þeirri grein á HM en hún hefur þrisvar sinnum slegið metið í 200 metra baksundi.

Fyrsta HM var í Róm



Fyrsta heimsmeistaramótið hennar var í Róm á Ítalíu fyrir átta árum síðan og þá var hún bara átján ára gömul. Hrafnhildur náði engu að síður og þrátt fyrir reynsluleysið að setja nýtt Íslandsmet í 200 metra bringusundi. Það skilaði henni upp í 37. sæti. Hrafnhildur setti síðan tvö Íslandsmet á næstu tveimur heimsmeistaramótum, í Sjanghæ í Kína 2011 og í Barcelona á Spáni 2013, en hún tvíbætti metið sitt í 50 metra bringusundi í Barcelona.

Besta heimsmeistaramótið hennar var síðan í Kazan í Rússlandi fyrir tveimur árum. Hrafnhildur setti þá alls fimm Íslandsmet og komst inn á topp tíu í þremur greinum. Hún varð í 6. sæti í 100 metra bringusundi, í 7. sæti í 50 metra bringusundi og í 9. sæti í 200 metra bringusundi.

Hrafnhildur hefur líka sett mörg Íslandsmet á Evrópumeistaramótinu og það hefur verið hægt að ganga að því vísu síðasta áratuginn að Hrafnhildur mætir í bætingaham þegar hún hittir þær bestu í sínum greinum.

Íslandsmet á fimm heimsmeistaramótum í röð

HM í Róm, Ítalíu 2009

30. júlí - Íslandsmet í 200 metra bringusundi (2:31.39 mínútur)

HM í Sjanghæ, Kína 2011

24. júlí - Íslandsmet í 200 metra fjórsundi (2:18.20 mínútur)

25. júlí - Íslandsmet í 100 metra bringusundi (1:09.82 mínúta)

HM í Barcelona, Spáni 2013

3. ágúst - Íslandsmet í 50 metra  bringusundi (31,50 sekúndur)

3. ágúst - Íslandsmet í 50 metra  bringusundi (31,37 sekúndur)

HM í Kazan, Rússlandi 2015

3. ágúst - Íslandsmet í 100 metra bringusundi (1:06.87 mínúta)

6. ágúst - Íslandsmet í 200 metra bringusundi (2:23.54 mínútur)

6. ágúst - Íslandsmet í 200 metra bringusundi (2:23.06 mínútur)

8. ágúst - Íslandsmet í 50 metra  bringusundi (30,90 sekúndur)

8. ágúst - Íslandsmet í 50 metra  bringusundi (30,90 sekúndur, metjöfnun)

HM í Búdapest, Ungverjalandi 2017

29. júlí - Íslandmet í 50 metra bringusundi (30.71 sekúndur)