Tveir titilbardagar í Kanada

UFC tilkynnti í gær að það yrði keppt um tvö belti á UFC 215 sem fram fer í Kanada í byrjun september.

Þá munu þær Amanda Nunes og Valentina Shevchenko mætast í bardaga um titilinn í bantamvigt kvenna. Þær áttu að berjast um daginn en þó dró Nunes sig úr bardaganum á elleftu stundu. Nú getur hún ekki flúið aftur.

Þá mun fluguvigtarmeistarinn ótrúlegi, Demetrious Johnson, verja titil sinn gegn Ray Borg. Hann er verja titilinn í ellefta sinn og hafi hann betur verður það met hjá UFC. Hann á metið með Anderson Silva í dag en ætlar að eigna sér það.

Er Johnson stígur inn í búrið verða tæp fimm ár frá því að hann varð meistari í fluguvigtinni. Það er fátt sem bendir til annars en að hann verði það áfram enda enn í hrikalegu formi.

Borg hefur unnið tvo bardaga í röð og fimm af síðustu sex bardögum sínum.