Ég hef verið að berjast of lítið

„Maður þarf kannski að gera meira af þessu að vera bara heima og slaka á,“ segir Gunnar Nelson léttur en hann er kominn í níunda sætið á styrkleikalista UFC í veltivigtinni.

Það sem er áhugavert við stöðu Gunnars á listanum er að hann hefur farið upp um þrjú sæti síðan hann barðist síðast. Hann hefur aldrei verið hærra á listanum en í dag.

London gæti kallað

Mjölnismaðurinn barðist síðast í maí í fyrra er hann kláraði Rússann Albert Tumenov í annarri lotu. Hann átti að berjast við Kóreubúann Dong Hyung Kim í Belfast í nóvember en varð að draga sig úr bardaganum vegna ökklameiðsla.

„Ökklinn er fullkominn núna og ég er að æfa á fullu. Nú er ég að vonast eftir því að fá bardaga í mars eða apríl,“ segir Gunnar en það var búið að útiloka að hann gæti keppt í London þann 18. mars þar sem kvöldið var orðið fullskipað. UFC hefur nú opnað smá glugga og hugsanlegt að Gunnari verði bætt inn á það kvöld.

„Ég vildi komast inn á þetta kvöld í London og það er ekki úr myndinni. Ég vil nú samt ekki gefa fólki of miklar vonir og ég myndi ekkert panta miða alveg strax.“

Viðræður við Dong

Komist Gunnar ekki inn á bardagakvöldið í London þá er næsta kvöld þar á eftir þann 8. apríl. Það er UFC 210 í Buffalo þar sem bardagi Daniels Cormier og Anthony Johnson er aðalbardagi kvöldsins.

„Ég var spenntur fyrir New York-kvöldinu sem er fram undan en ekki alveg eins spenntur fyrir Buffalo. Það er samt eitthvað splunkunýtt, gott kvöld og stutt að fara á austurströndina í Bandaríkjunum. Í rauninni er mér samt alveg sama hvar ég berst,“ segir Gunnar en það hafa verið viðræður um að hann berjist við Dong eftir allt saman. Ef það gengur ekki er okkar maður opinn fyrir hverju sem er og meðal annars bardaga gegn hinum skrautlega Donald „Cowboy“ Cerrone sem er í sætinu fyrir ofan Gunnar á styrkleikalista UFC. „Það væri frábær bardagi. Hann er stórt nafn í Ameríku og ég myndi taka honum opnum örmum.“

Stefnir á þrjá bardaga

Gunnar hafði sett stefnuna á fjóra bardaga á síðasta ári en náði aðeins einum. Árið 2015 barðist hann aðeins tvisvar og þetta eru því aðeins þrír bardagar á síðustu tveimur árum. Hann er ekki að ná nógu mörgum bardögum til þess að klífa enn hærra eins og hann stefnir á að gera.

„Þetta er mjög misjafnt eftir mönnum. Þetta er kannski í minna lagi. Ég ætla kannski ekki að segjast ætla að ná fjórum núna en ég set stefnuna á þrjá bardaga á þessu ári. Þessi íþrótt er samt allt öðruvísi en aðrar íþróttir. Þeir sem eru á toppnum eru kannski í mesta lagi að berjast tvisvar á ári en svo eru gæjar sem berjast meira. En það er rétt. Ég hef verið að berjast of lítið á síðustu tveimur árum,“ segir Gunnar Nelson.