White býður Mayweather og McGregor tæplega þrjá milljarða fyrir að berjast

Dana White, forseti UFC, vill bjóða Floyd Mayweather og Conor McGregor 25 milljónir dollara á mann fyrir að berjast á móti hvor öðrum. UFC og bardagakapparnir myndu síðan skipta með sér sjónvarpstekjunum. Þeir myndu því fá um 2,9 milljarða íslenskra króna.

Fyrr í vikunni bauð Mayweather írsku MMA-ofurstjörnunni að mæta sér í hnefaleikahringnum og lofaði honum um tvo milljarða íslenskra króna fyrir.

Þettta sagði Mayweather sjálfur frá í viðtali í þætti á íþróttasjónvarpsstöðinni ESPN. Hann sagði að hnefaleikabardagi við írska vélbyssukjaftinn væri það eina sem gæti lokkað hann til að taka fram hanskana aftur en Mayweather hætti fyrir tveimur árum ósigraður eftir 49 bardaga.

„Ég er eini maðurinn sem get í raun komið með eitthvað alvöru tilboð,“ segir Dana White við fjölmiðla ytra.

„Við munum borga þeim báðum 25 milljónir dollara og ræðum síðar um skiptingu sjónvarpstekna.“