Lostafyllsta aug­lýsinga­stofa landsins: 18 net­föng inni á AdultFriendFinder

„H:N Markaðssamskipti hljóta að vera lostafyllsta auglýsingastofa landsins. Miðað við starfsmannafjölda er 110% skráning á þessa síðu,“ segir Ingvi Jökull Logason, framkvæmdastjóri H:N Markaðssamskipta.

Samkvæmt fréttum í  morgun eru að minnsta kosti 10.459 netföng með endinguna .is skráð á skyndikynnasíðuna AdultFriendFinder sem auglýsir sig sem „stærsta samfélag kynlífs- og makaskiptaáhugamanna í heiminum“. Þar af eru 18 netföng með endinguna @hn.is en lénið er í eigu H:N Markaðssamskipta.

Samkvæmt Vísi.is komst upp um stærðarinnar tölvuárás á gagnagrunn síðunnar, sem og vefmyndavélaklámsíðnanna iCams og Stripshow auk annarra sambærilegra síðna á sunnudag þegar vefsíðan Leaked Source sagðist hafa notendaupplýsingar 412 milljóna notenda undir höndum, þar af 340 milljóna notenda AdultFriendFinder. Til samanburðar var upplýsingum 32 milljóna notenda Ashley Madison stolið í fyrra, þar af voru 128 með íslensk netföng.

Leaked Source segist hafa fengið gögnin frá nafnlausum tölvuþrjótum og hyggst vefsíðan ekki birta upplýsingarnar.

„Við erum um tuttugu í húsi, þar af eru sautján með netfang sem endar á @hn.is. Ég þarf greinilega að ræða við starfsfólkið mitt,“ segir Ingvi Jökull skellihlæjandi.

„Ástæðan fyrir þessu er nú einföld því við keyptum lénið hn.is af Vodafone á sínum tíma en fram að því hafði fólki boðist að skrá frítt netfang með endinguna hn.is eða heimsnet.is. Þetta eru væntanlega einhverjar leifar síðan þá. Þarna má meðal annars finna gömul lén eins og torg.is og strik.is. En góð saga á aldrei að líða fyrir sannleikann svo við skulum ekkert vera að kafa dýpra í málið. Enda hljóta allir að vera löngur búnir að skipta yfir á Tinder svo þetta er eitthvað gamalt.“