Phelps bætti við tveimur gullverðlaunum

Líklega besti íþróttamaður allra tíma, Michael Phelps, hélt áfram að bæta ótrúlegan árangur sinn á Ólympíuleikunum í nótt.

Þá vann hann tvö gullverðlaun til viðbótar og er því búinn að vinna 21 gullverðlaun á Ólympíuferli sínum.

Þessi 31 árs gamli Bandaríkjamaður vann 200 metra flugsundið og var svo í sveit Bandaríkjanna sem vann gull í 4x200 metra skriðsundi.

„Þetta er ansi mikið af verðlaunum. Þetta er eiginlega algjör sturlun. Ég á ekki til orð,“ sagði Phelps í nótt.

Sigurinn í flugsundinu var sérstaklega sætur fyrir Phelps enda tapaði hann fyrir Bretanum Chad le Clos í þessari grein árið 2012.

„Ég vildi fá þessi verðlaun til baka. Ég átti mér stórt markmið í lauginni í nótt og náði mínu markmiði.“