Wilshere hrósar ensku stuðningsmönnunum

Enski miðjumaðurinn Jack Wilshere segir að stuðningsmenn Englands á leiknum gegn Rússlandi hafi verið frábærir.

Átök voru á milli stuðningsmanna liðanna fyrir leik og Rússarnir gerðu svo atlögu að ensku stuðningsmönnunum í leikslok. Bæði lið eiga á hættu að vera rekinn úr mótinu ef slík uppákoma endurtekur sig.

„Stuðningsmennirnir standa sig alltaf frábærlega í stúkunni. Alveg sama hvar við erum,“ sagði Wilshere.

„Við sáum allir á Twitter hvað hafði gerst fyrir leikinn en um leið og við komum á völlinn urðum við ekki varir við neitt nema flottan stuðning. Þeir hjálpuðu okkur mikið.“